زیقار – INA – زەهرا سەباح
ئەمڕۆ دووشەممە، پارێزگاری زیقار، هەیسەم حەمدانی، پێکهێنانی ژووری ئۆپەراسیۆنەکانی وەک ئامادەکارییەک بۆ دەیەی یەکەمی موحەڕەمی حەرام ڕاگەیاند، هاوكات ئاماژەی بە بەدواداچوونی مەلەفی کارەبا و مۆلیدەکان لە پارێزگاکەدا کرد.
حەمدانی بە ئاژانسی هەواڵی عێراقی (INA)ی ڕاگەیاند: "کۆبوونەوەیەکی بەپەلەمان بە ئامادەبوونی نوێنەرانی فەرمانگە خزمەتگوزارییەکان، بەڕێوەبەرایەتیی پۆلیس و لایەنە ئەمنییەکان ئەنجامدا، ئەمەش بە مەبەستی تاووتوێکردنی ئامادەکارییە پێویستەکان و دیاریکردنی داواکاری و پێداویستییەکان لە ماوەی دەیەی یەکەمی مانگی موحەڕەمی حەرامدا".
ئاماژەی بەوەشکرد کە: "کۆبوونەوەکە پێکهێنانی ژووری ئۆپەراسیۆنەکانی بە سەرۆکایەتی خۆمان و ئەندامێتی سەرجەم فەرمانگە پەیوەندیدارەکان لەخۆگرت، بۆ بەدواداچوونی جێبەجێکردنی ڕێکار و پلانە خزمەتگوزاری و ئەمنییەکان، لە پاڵ گفتوگۆکردن لەسەر مەلەفی کارەبا و پێداویستی ڕاستەقینەی وزە لە ڕۆژانی مانگی موحەڕەمدا".
ئاماژەی بەوەشکرد: "لیژنەی ناوەندی و لاوەکی بە سەرۆکایەتی سەرۆکی یەکە کارگێڕییەکان پێکهێنراون بۆ بەدواداچوونی کاری خاوەن مۆلیدە ئەهلییەکان، تا ڕێکاری یاسایی دژی سەرپێچیکاران بگیرێتەبەر، ئەمەش بە هەماهەنگی لەگەڵ کۆمپانیای دابەشکردنی بەرهەمە نەوتییەکان دوای دەرچوونی ڕەزامەندی وەزیری نەوت بۆ دابینکردنی بێبەرامبەری سووتەمەنی بۆ خاوەن مۆلیدەکان"، هاوكات داوای کرد "پابەندبوون بە ڕێنماییەکانی وەزارەت، پارێزگا و ئەنجومەنەکەی بکرێت، بۆ مسۆگەرکردنی بەردەوامیی دابینکردنی کارەبا بۆ هاووڵاتیان، لە پاڵ هەبوونی هەماهەنگییەکی باڵا لە نێوان خاوەن مۆلیدەکان و دابەشکردنی ناوەندی لەلایەن وەزارەتی کارەباوە".
ڕوونی کردەوە کە "کۆبوونەوەکە باسی لەو کێشانەش کردووە کە ڕووبەڕووی فەرمانگە خزمەتگوزارییەکان و سەرجەم یەکە کارگێڕییەکان دەبنەوە"، جەختیشی کردەوە کە "چارەسەر بۆ ژمارەیەک لە ئاستەنگەکان داندراوە، لە کاتێکدا نووسراوی فەرمی ئاراستەی وەزارەتە پەیوەندیدارەکان دەکرێت، لەگەڵ ئەنجامدانی دیدار لەم هەفتەیەدا لەگەڵ زیاتر لە چوار وەزارەت بۆ چارەسەرکردنی مەلەفە هەڵپەسێردراوەکان".