بەغدا - INA
شاندی هەڵبژاردەی تۆپی پێی عێراق گەیشتە شاری بۆستنی ئەمریکی، وەک ئامادەکارییەک بۆ ڕووبەڕووبوونەوەی هەڵبژاردەی نەرویج لە بەرەبەیانی ڕۆژی چوارشەممەدا، ئەمەش لە سەرەتای کاروانی یارییەکانی لە چوارچێوەی ڕکابەرییەکانی مۆندیالی 2026دا.
پەیامنێری ئاژانسی هەواڵی عێراقی (INA) ڕایگەیاند، کە "هەڵبژاردەی نیشتیمانی لە ڕێگەی فڕۆکەیەکی تایبەتەوە کە لەلایەن فیدراسیۆنی نێودەوڵەتیی تۆپی پێ (FIFA) دابینکرابوو گەیشتووەتە بۆستن، بە مەبەستی ئەنجامدانی یەکەمین یاریی خۆی لەم پاڵەوانێتییە جیهانییەدا".
ئاماژەی بەوەش کرد کە "هەڵبژاردەکە ئەمڕۆ دووشەممە، دواین یەکەی مەشق و ڕاهێنانی خۆی پێش ڕووبەڕووبوونەوەی نەرویج ئەنجام دەدات، بۆ دڵنیابوون لە ئامادەیی هونەری و جەستەیی یاریزانان؛ بە جۆرێک کە بەشە مەشقەکە ڕاهێنانەکانی ڕاکێشان و خۆگەرمکردنەوە لەخۆدەگرێت، ودواتریش جێبەجێکردنی پلانە هونەری و کارامەیییەکان و ژمارەیەک ڕستەی تاکتیکی کە لەلایەن ستافی ڕاهێنەرانەوە ئامادەکراون".
ئاشکراشی کرد، "ستافی ڕاهێنەران بە سەرۆکایەتی ڕاهێنەری ئوسترالی گراهام ئارنۆڵد، یارییەکی مەشقی لە نێوان یاریزانانی سەرەکی و یەدەگدا ئەنجام دەدەن، بۆ دانانی دواین دەستکارییەکان لەسەر ئەو پلانەی کە لە یارییەکەدا پشتی پێ دەبەستن، ئەمەش بە پشتبەستن بە شیکردنەوەی هونەری و پێدراوە تایبەتەکانی ئاستی هەڵبژاردەی نەرویج".
ڕوونی کردەوە کە "بەرنامەی هەڵبژاردەکە گوتارێکی هاندەرانیش لەخۆدەگرێت کە ئارنۆڵد بۆ یاریزانانی پێشکەش دەکات، بە مەبەستی بەهێزکردنی ورەی مەعنەوی و بەرزکردنەوەی ئاستی تەرکیز پێش ئەنجامدانی ئەم ڕووبەڕووبوونەوە چاوەڕوانکراوە، و هاندانیان بۆ پێشکەشکردنی باشترینەکانیان بە مەبەستی بەدیهێنانی سەرەتایەکی ئەرێنی لە مۆندیالدا".
شێرەکانی ڕافیدەین هیواخوازن کە دەستپێکێکی بەهێز لەم بەشدارییە مێژووییەیاندا لە مۆندیالی 2026 تۆمار بکەن، بەو شێوەیەی کە چانسەکانیان بۆ کێبڕکێکردن لەسەر یەکێک لە کارتەکانی سەرکەوتن لە کۆمەڵەی نۆیەمدا بەهێزتر بکات.