بەغدا ـ INA ـ ویسام مەلا
ئەمڕۆ دووشەممە، دەستەی گشتیی گومرک، هاتنەناوەوەی یەکەم ناردراوی ترانزێتی بە سیستەمی (TIR) لە ڕێگەی دەروازەی سنووریی ڕەبیعەوە ڕاگەیاند، هاوکات ئاماژەی بەوە کرد کە کاراکردنی ئەم سیستەمە پێگەی عێراق وەک ڕێڕوێکی بازرگانیی هەرێمی بەهێز دەکات.
بەڕێوەبەری دەستەکە، ثامر قاسم داود، لە لێدوانێکدا بۆ ئاژانسی هەواڵی عێراقی (INA) ڕایگەیاند: "هاتنەناوەوەی یەکەم ناردراوی ترانزێت بە سیستەمی (TIR) لە ڕێگەی دەروازەی سنووریی ڕەبیعەوە کە لە کۆماری عەرەبیی سووریاوە هاتووە و بەرەو دەوڵەتی کوێتی برا بەڕێ دەکەوێت، هەنگاوێکی گرنگە لە کاروانی پەرەپێدانی کەرتی گواستنەوە و تێپەڕبوونی نێودەوڵەتی، و ڕەنگدانەوەی ئەو سەرکەوتنە بەردەوامانەیە کە دەستەی گشتیی گومرک لە کاراکردنی ڕێککەوتننامە نێودەوڵەتییەکان و بەهێزکردنی پێگەی عێراق لەسەر نەخۆشەی بازرگانیی هەرێمی و نێودەوڵەتیدا بەدەستی هێناون".
ئاماژەی بەوەش کرد کە "ئەم دەستکەوتە ئامادەییی دەروازە سنوورییەکانی عێراق پشتڕاست دەکاتەوە بۆ پێشوازیکردن و بەڕێوەبردنی پرۆسەکانی ترانزێت بەپێی سیستەم و پێوەرە جیهانییە پەسندکراوەکان، بەتایبەتی لەگەڵ پشتبەستن بە سیستەمە هاوچەرخەکانی بەدواداچوون (GPS) کە ئاستێکی بەرزی چاودێری و کارامەیی دابین دەکەن و بەشدارن لە ئاسانکاریی جووڵەی کاڵاکان و ڕەوانیی گواستنەوەیان لە ڕێگەی خاکەکانی عێراقەوە".
تیشکی خستە سەر ئەوەش کە "بە شێوەیەکی بەردەوام کار دەکەن بۆ پەرەپێدانی ژینگەی کاری گومرکی و فراوانکردنی مەودای جێبەجێکردنی سیستەمی (TIR)، بە جۆرێک کە بگونجێت لەگەڵ ئاڕاستەکانی حکومەت لە بەهێزکردنی پەیوەندیی بازرگانی لەگەڵ وڵاتانی ناوچەکە و گۆڕینی عێراق بۆ ڕێڕوێکی ئابووریی کارا کە بازاڕە هەرێمی و نێودەوڵەتییەکان پێکەوە دەبەستێتەوە".
ستایشی ئەو هەوڵانەشی کرد کە لەلایەن ستافە کاراکان لە دەروازەی ڕەبیعە و هۆبەی ترانزێت و بەشە پاڵپشتەکانی دەستەکە دراون، کە بەشداربوون لە ڕاپەڕاندنی ئەم پرۆسەیە بە سەرکەوتوویی، بەو شێوەیەی کە متمانە بە دەروازەکانی عێراق بەهێز دەکات و پاڵپشتیی جووڵەی بازرگانی و گواستنەوەی نێودەوڵەتی لە ڕێگەی وڵاتەکەوە دەکات.