محەممەد بن عەبدولڕەحمان ئالسانی، سەرۆکوەزیران و وەزیری دەرەوەی قەتەر، پێشوازی لە یاداشتنامەی لێکتێگەیشتنی نێوان ئەمەریکا و کۆماری ئیسلامی ئێران دەکات و بە هەنگاوێکی ئەرێنی بە ئاراستەی کەمکردنەوەی گرژییەکان و پتەوکردنی سەقامگیریی ناوچەکە ناوی دەبات.
سەرۆکوەزیرانی قەتەر هەروەها سوپاسی پاکستان و لایەنە ناوچەیی و نێودەوڵەتییەکانی دیکەی کرد کە ڕۆڵیان هەبوو لە ڕەخساندنی زەمینە بۆ گەیشتن بەم لێکتێگەیشتنە.
ئەلسانی داوای لە هەموو لایەنە پەیوەندیدارەکان کرد بە ڕوانگەیەکی ئەرێنی و بنیاتنەر و هاوکارییەوە لە دانوستاندن و دانوستانەکانی داهاتوودا بەردەوام بن لە پێناو خۆشکردنی ڕێگا بۆ پێشکەوتنی زیاتر لە پرۆسەی دیپلۆماسی.
هەروەها جەختی لە پابەندبوونی قەتەر کردەوە بۆ پاڵپشتیکردنی هەوڵە دیپلۆماسیەکان بە ئامانجی بەهێزکردنی سەقامگیری و ئاسایش لەسەر ئاستی ناوچەیی و نێودەوڵەتی، هەروەها گوتی دەوحە بەردەوام دەبێت لە پاڵپشتیکردنی چارەسەرەکان لەسەر بنەمای دیالۆگ و دیپلۆماسی.