نێودەوڵەتی – INA
ئاژانسی هەواڵی "فارس" ئەمڕۆ پێنجشەممە ڕایگەیاند، ئەو دەقەی لەلایەن ئێرانەوە پێشنیار کرابوو لەلایەن ئەمریکاوە پەسەندکراوە، و جەختی کردەوە کە واژۆکردنی ڕێککەوتنەکە بەم زووانە دەستپێدەکات.
ئاژانسی هەواڵی ئێرانی "فارس" لە زاری سەرچاوە ئاگادارەکانەوە ڕایگەیاندووە، ڕەشنووسی یاداشتی لێکتێگەیشتنی نێوان شاندی ئەمریکی و ئێرانی نزیکەی دوو هەفتە لەمەوبەر بەرەو تەواوبوون دەچوو، پێش ئەوەی دۆناڵد ترەمپ، سەرۆکی ئەمریکا داوای جێگیرکردنی وردەکاری نوێ لەناو دەقەکەدا بکات.
سەرچاوەکان ئاماژەیان بەوەش کردووە، ئێران لایەنی ئەمریکی ئاگادارکردووەتەوە لە ڕەتکردنەوەی پێداچوونەوە بە گەڵاڵە هەموارکراوەکەدا، ئەمەش بووە هۆی پەککەوتنی دانوستانەکان، هاوکات لەگەڵ دروستبوونی گرژییەکان لە گەرووی هورموز و باشووری ئێران و هێرشکردنە سەر گەڕەکەکانی باشووری بەیرووت، کە ئەمانەش بەشداربوون لە بەستنی ڕەوتی دانوستانەکان.
ئەوەشیان خستووەتەڕوو، لایەنی قەتەری لە ڕۆژی چوارشەممەوە هاتووەتە سەر هێڵی نێوەندگیری، و تارانی ئاگادارکردووەتەوە لە پاشەکشەی ویلایەتە یەکگرتووەکانی ئەمریکا لەو بڕگە زیادانەی کە پێشتر خرابوونەڕوو.
بەپێی سەرچاوەکان، ترەمپ لە ڕێگەی هەڵمەتێکی ڕاگەیاندن و وتاری گرژکەرەوەوە هەوڵیداوە وا پێشان بدات کە ئێران لەژێر فشاری ئۆپەراسیۆنە سەربازییەکاندا پاشەکشەی کردووە، بەڵام جەختیان کردووەتەوە کە تاران تا ئێستا وەڵامی کۆتایی خۆی نەداوەتەوە، و ئەوە واشنتۆن بووە کە گەڕاوەتەوە سەر هەڵوێستی پێشووی خۆی.
سەرچاوەکان جەختیان کردووەتەوە کە قبوڵکردنی دەقە پێشنیارکراوەکەی ئێران لەلایەن ویلایەتە یەکگرتووەکانی ئەمریکاوە، ئەگەری پەسەندکردنی لەلایەن لایەنە پەیوەندیدارەکانی ڕژێمی ئێرانەوە زیاد دەکات، ئەمەش ڕەنگە ڕێگا خۆش بکات بۆ گەیشتن بە لێکتێگەیشتن لە نێوان هەردوولادا.