بەغداد – INA - محەمەد حەداد
وەزیری بازرگانی مستەفا نزار عانی، ئەمڕۆ پێنجشەممە، ٤٦ کۆمەڵگەی کۆگاکردنی لە پارێزگای نەینەوا کردەوە، هاوکات جەختیکردەوە کە ئەمساڵ ڕێکاری نوێ پەیڕەو دەکرێن کە جیاوازن لە وەرزەکانی پێشوو، بە مەبەستی لەخۆگرتنی بەرهەمی گەنمی زیادە.
لە بەیاننامەیەکدا کە بۆ ئاژانسی هەواڵی عێراقی نێردراوە، هاتووە: "پارێزگاری نەینەوا عەبدولقادر دەخیل، پێشوازی لە وەزیری بازرگانی مستەفا نزار عانی و شاندی هاوڕێی کرد، کە بەڕێوەبەری گشتیی بازرگانیی دانەوێڵە، حەیدەر کرعاوی، لەگەڵ ژمارەیەک لە ئەندامانی ئەنجومەنی نوێنەران و ئەنجومەنی پارێزگا، بەڕێوەبەری گشتیی ئاسایشی ئابووری، بەڕێوەبەری ئاسایشی نیشتمانی لە نەینەوا، و بەڕێوەبەرانی کۆمپانیای بازرگانیی دانەوێڵە و فۆرمی خۆراکی نەینەوای لەخۆگرتبوو".
پارێزگاری نەینەوا جەختیکردەوە: کە "ئەم سەردانە هاوکاتە لەگەڵ دەستپێکردنی وەرزی بەبازاڕکردنی بەرهەمی گەنم"، ئاماژەی بەوەش دا کە "ڕووبەرە چێندراوەکان لە پارێزگاکەدا لە چوار ملیۆن دۆنم تێپەڕیون"، و وەرزی ئێستاشی بە وەرزێکی "نائاسایی" وەسف کرد.
دەخیل ڕوونیشیکردەوە: "حکومەتی خۆجێی کار دەکات بۆ جێبەجێکردنی ئەو سیاسەتەی کە حکومەتی ناوەندی دەیگرێتەبەر لەوەی پەیوەندیدارە بە پرۆسەکانی بەبازاڕکردن و وەرگرتنی بەرهەمەکە، بە هاوکاری لەگەڵ وەزارەتی بازرگانی"، جەختیشیکردەوە کە "ئەو هەوڵانەی دەدرێن نوێنەرایەتی کارێکی تەواوکاری دەکەن لە نێوان هەردوولادا بۆ دەستەبەرکردنی سەرکەوتنی وەرزی کشتوکاڵی".
لەلایەن خۆیەوە، وەزیری بازرگانی ڕایگەیاند: "سەردانەکەی بۆ نەینەوا بە مەبەستی ڕاگەیاندنی وەرزی بەبازاڕکردنی ئەمساڵ و کردنەوەی کۆمەڵگەکانی کۆگاکردنی تایبەت بە پارێزگاکەیە کە ژمارەیان ٤٦ کۆمەڵگەیە، بە ئامانجی لەخۆگرتنی بڕی بەرهەمی گەنم لە چوارچێوەی هەڵمەتێکدا کە دروشمی (گوڵە گەنمەكانی عێراق.. ئاسایشی خۆراکمانە)ی هەڵگرتووە".
تەئکیدیشیکردەوە: "وەزارەت کار دەکات بۆ پاڵپشتیکردنی جوتیاران و ئاسانکاری و لابردنی ئەو ڕێگریانەی کە لە کاتی پرۆسەی بەبازاڕکردندا ڕووبەڕوویان دەبێتەوە"، ئاماژەی بەوەش دا کە "ئەمساڵ ڕێکاری نوێ پەیڕەو دەکرێن کە جیاوازن لە وەرزەکانی پێشوو، کە دیارترینیان جێبەجێکردنی سیستمێکی ئەلیکترۆنییە بۆ ناونووسینی پێشوەختە بە هاوکاری لەگەڵ پارێزگای نەینەوا"، ئەوەشی خستەڕوو کە "پلانێک هەیە لەلایەن وەزارەتەوە داڕێژراوە بۆ لەخۆگرتنی بەرهەمی زیادە، تاوەکو هەوڵی جوتیاران بەفیڕۆ نەچێت".
عانی ڕوونی کردەوە، "سیستمە نوێیەکە ئامادەکراوە بۆ ڕێکخستنی پرۆسەکانی بەبازاڕکردن و ئاسانکردنی ڕێکارەکانی ڕادەستکردنی بەرهەمەکە، جیا لە پاراستنی جوتیاران لە حاڵەتەکانی سەوداکردن یان سەرانەسەندن (ابتزاز) کە ڕەنگە ببنە ڕێگر لەبەردەم ڕەوتی ئاسایی کارەکان لەم وەرزەدا".