بەغداد - INA
دەستەی دەسپاکی فیدراڵی، ئەمڕۆ پێنجشەممە، دەستگیرکردنی ٧ تۆمەتباری پشتڕاستکردەوە کە چواریان خەمڵێنەرن لە یەکێک لە فەرمانگەکانی باج لە پارێزگای نەینەوا، لەسەر پاشخانی ئەنجامدانی بەئەنقەستی ئەو کارانەی کە پێچەوانەی ئەرکە وەزیفییەکانیانن.
له بەیاننامەیەکی دەستەکەدا کە بۆ ئاژانسی هەواڵی عێراقی نێردراوە، هاتووە: "تیمێکی کار کە لە بەڕێوەبەرایەتیی لێکۆڵینەوەی نەینەوا پێکهێنرابوو، چوونە سەر فەرمانگەی باجی مووسڵ/ بەری چەپ، و لەوێ توانییان ٤ خەمڵێنەر دەستگیر بکەن، بەهۆی ئەوەی هەستاون بە دزەپێکردنی فۆرمەکانی ژمێریاریی باج بۆ گواستنەوەی خاوەندارێتی و فۆرمەکانی ڕاپۆرتی باجی داهات بۆ نووسینگەکانی کۆپیکردن نزیک لە فەرمانگەکە لەبەرامبەر بڕە پارەیەکدا"، ئاماژەی بەوەشکرد: "ئەو فۆرمانە فەرمین و بە خۆڕایی بەسەر باجدەراندا دابەش دەکرێن، و مامەڵەکردن پێیانەوە لەلایەن کەسانی دەرەوەی فەرمانبەران قەدەغەیە".
ئەوەشی خستووەتەڕوو: "لە ماوەی ئۆپراسیۆنەکەدا ٣ تۆمەتباری دیکە دەستگیرکراون، کە یەکێکیان خاوەنی نووسینگەیەکی کۆپیکردنە، دوای ئەوەی چەندین مامەڵەیان لێ دۆزراوەتەوە کە بە هاوکاری لەگەڵ خەمڵێنەرەکاندا ڕایی دەکەن و بەدواداچوونی بۆ دەکەن، ئەمەش بە پێچەوانەی خشتەی دابەشکردنی کارەکان کە پێی کار دەکرێت".
بەیاننامەکە راشیگەیاند: "تیمەکە کۆنووسێکی فەرمیی دەستبەسەرداگرتنی ڕێکخست، و لەگەڵ ٧ تۆمەتبارەکەدا خستیانە بەردەم دادوەری دادگای لێکۆڵینەوەی نەینەوای تایبەت بە کەیسەکانی دەسپاکی، ئەویش بڕیاری ڕاگرتنیانی دا بەپێی حوكمەكانی ماددەی ٣٣١ لە یاسای سزادان".