بەغدا - INA
دەستەی دەسپاکی، ئەمڕۆ چوارشەممە ڕایگەیاند، ٨ تۆمەتبار لە کاتی ڕاییكردنی مامەڵەکان بەبێ هەبوونی سیفەتی یاسایی لە پارێزگای موسەننا دەستگیر کراون.
نووسینگەی ڕاگەیاندنی دەستەکە لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: تیمە مەیدانییەکانی نووسینگەی لێکۆڵینەوەی موسەننا، چوونەتە بەڕێوەبەرایەتییەکانی کشتوکاڵ، تۆمارکردنی خانووبەرە، کۆمەڵگەی تۆمارکردنی هاتووچۆ و لقی دەستەی گشتیی باج لە پارێزگاکە، و دوای بەدواداچوون و چاودێریکردن توانییان (٨) کەس لەو فەرمانگانەدا دەستگیر بکەن، لەسەر بنەمای ڕاییكردنی مامەڵەی هاووڵاتیان بەبێ بریکارنامەی فەرمی یان سیفەتێکی یاسایی کە ڕێگەیان پێ بدات ئەو کارە بکەن، ئاماژەی بەوەش کرد کە دەستبەسەرداگرتنی چەندین مامەڵە، بریکارنامە و نووسراوی فەرمی بەتاڵ و بێ ژمارەی دەرچوو لە لای هەندێکیان تۆمار کراوە.
ڕاگەیەندراوەکە زیادی کرد: تیمەکە لە بەڕێوەبەرایەتیی تۆمارکردنی خانووبەرە، دەستیان بەسەر دۆسیەی خانووبەرەیەکدا گرتووە کە بە پێچەوانەی یاسا دووجار و بۆ دوو کەسی جیاواز تۆمار کراوە، ئاماژەی بەوەش کرد کە یەکێک لە مامەڵەکانی ئەو خانووە ون بووە، و تا ئێستا لێکۆڵینەوەکان بەردەوامن بۆ دەستنیشانکردنی کەمتەرخەمەکان و گرتنەبەری ڕێکاری یاسایی گونجاو بەرامبەریان. هەروەها ئاماژەی بە بڕیاری دادوەری دادگای لێکۆڵینەوەی دەسپاکی لە موسەننا کرد کە بڕیاری ڕاگرتنی هەندێک لە تۆمەتبارانی داوە، بەپشتبەستن بە ئەحکامەکانی هەردوو ماددەی (٢٤٠ و ٣٣١) لە یاسای سزادانی عێراقی.