بەغدا - INA
ئەمڕۆ دووشەممە، سەرۆکی دەستەی دەروازە سنوورییەکان فەریق عومەر عەدنان وائیلی، ڕێنمایی دا بە ئاسانکردنی ڕێکارەکان و زیادکردنی داهاتەکان بەپێی ڕاسپاردەکانی حکومەت.
دەستەی دەروازە سنوورییەکان لە ڕاگەیەندراوێکدا کە بە دەست ئاژانسی هەواڵی عێراقی (INA) گەیشتووە، ڕایگەیاند: "سەرۆکی دەستەی دەروازە سنوورییەکان فەریق عومەر عەدنان وائیلی، بەسەرکردنەوەیەکی مەیدانیی بۆ هەردوو بازگەی چیمەن و دێگەڵە (دارمان) لە پارێزگای کەرکوک ئەنجام دا، کە پارێزگاکە بە هەرێمی کوردستانەوە بەرەو پارێزگاکانی سلێمانی و هەولێر دەبەستنەوە، بە مەبەستی ئاگاداربوون لە چۆنیەتی بەڕێوەچوونی کارەکان و بەدواداچوونی ئەو ڕێکارانەی لە ڕێکخستنی جووڵەی گەشتیاران و کاڵاکاندا دەگیرێنەبەر".
ڕاگەیەندراوەکە ئاماژەی بەوەشکرد کە، "وائیلی لە میانی بەسەرکردنەوەکەیدا، چاوی بە چەندین شۆفێری بارهەڵگر و ئۆتۆمبێل و هاوڵاتیان و کارمەندانی هەردوو بازگەکە کەوت، و بە شێوەیەکی ڕاستەوخۆ گوێی لە تێبینی و پێداویستییەکانیان گرت"، جەختیشی کردەوە کە "حکومەت بایەخێکی گەورە بە ئاسانکردنی جووڵەی گواستنەوە و بازرگانی و پێشکەشکردنی باشترین خزمەتگوزاری بە هاوڵاتیان دەدات".
وائیلی – بەپێی ڕاگەیەندراوەکە – ڕێنمایی دا بە "سەرجەم ئەو لایەنانەی لە هەردوو بازگەکەدا کار دەکەن، بە پێویستیی پابەندبوونی تەواو بە ڕاسپاردەکانی حکومەتەوە کە ئامانجیان سادەکردنەوەی ڕێکارەکان، خێراکردنی ڕاپەڕاندنی مامەڵەکان و کەمکردنەوەی ڕۆتینە، بە جۆرێک کە چستیی جووڵەی بازرگانی و هاتوچۆی هاوڵاتیان لە نێوان پارێزگاکاندا مسۆگەر بکات، هاوکات لەگەڵ پاراستنی ڕێکارە یاسایی و چاودێرییە پەسندکراوەکان".
وائیلی جەختی لەسەر "گرنگیی مامەڵەی شیاو لەگەڵ هاوڵاتیان و شۆفێرانی ئۆتۆمبێلەکاندا کردەوە، لەگەڵ کارکردن بە گیانی یەک تیمی لە نێوان فەرمانگە جیاوازە ئەمنی و خزمەتگوزارییەکاندا، بە شێوەیەک کە بەشدار بێت لە بەرزکردنەوەی کارامەیی ئەدا و بەدیهێنانی بەرزترین ئاستی هەماهەنگی و هاوکاری".
وائیلی ئاماژەی بەوەش کرد، "ئەم سەردانە مەیدانییە بەردەوامانە بۆ بەدواداچوونی ئەدا لەسەر ئەرزی واقیع، و چارەسەرکردنی ڕاستەوخۆی ڕێگرەکان دێت، لە پاڵ جێبەجێکردنی بەرنامەی حکومی کە ئامانجی پەرپێدانی ژینگەی کار، بەهێزکردنی ئاسایشی ئابووری، ئاسانکردنی جووڵەی بازرگانی و گواستنەوە لە سەرانسەری وڵاتدا و زیادکردنی داهاتە نانەوتییەکانە".