بەغدا - INA
ئەمڕۆ دووشەممە، سەرۆکی ئەنجومەنی وەزیران عەلی فالح زەیدی، جەختی لەسەر تەواوکاریی کارە خزمەتگوزاری و گەشەپێدانییەکان و بەردەوامبوون لە دژایەتیکردنی گەندەڵی و سنووردارکردنی چەک لە دەستی دەوڵەتدا کردەوە.
نووسینگەی ڕاگەیاندنی سەرۆکی ئەنجومەنی وەزیران لە ڕاگەیەندراوێکدا کە بە دەست ئاژانسی هەواڵی عێراقی (INA) گەیشتووە، ڕایگەیاند: "سەرۆک وەزیران عەلی فالح زەیدی، سەرۆکایەتی دووەم کۆبوونەوەی ساڵی 2026ی دەستەی باڵای هەماهەنگی نێوان پارێزگاکانی کرد، کە تێیدا تاووتوێی دۆخی گشتیی پارێزگاکان و لایەنە خزمەتگوزاری و بژێوییەکان کرا، لەگەڵ چەندین بابەت و دۆسیەی خراوەڕوو بەردەم دەستەکە، بە ئامادەبوونی چەندین وەزیر و بەڕێوەبەری نووسینگەی سەرۆکی ئەنجومەنی وەزیران، و پارێزگارەکان و سەرۆکی ئەنجومەنی پارێزگاکان و ڕاوێژکاران".
ڕاگەیەندراوەکە ئاماژەی بەوەشکرد کە، "زەیدی لە سەرەتای کۆبوونەوەکەدا ئاماژەی بە گرنگیی ڕەنگدانەوەی پلانە بنەڕەتی و ستراتیژییەکانی حکومەتی فیدراڵی لەسەر پلانی حکومەتە خۆجێییەکانی پارێزگاکان کرد، بە جۆرێک هەنگاوەکانیان تەواوکەری یەکتر بن بۆ پێشکەشکردنی باشترین خزمەتگوزاری بە هاوڵاتیان"، هاوكات جەختیشی لەسەر "بابەتی چەکی بڵاوکراوەی دەرەوەی یاسا کردەوە، و گرنگیی بەردەوامبوون لە سنووردارکردنی لەژێر دەستی دامەزراوەکانی دەوڵەتدا، کە ئەمەش پاڵپشتی لە ڕۆڵی گەشەپێدان و پێشخستنی ئابووریی خۆجێیی دەکات، هەروەها ئاماژەی بە ڕێکارەکانی دژایەتیکردنی گەندەڵی کرد و پێویستیی ئەوەی کە نابێت جووڵەکان تەنها بەرەو گەندەڵکارە بچووکەکان بن و ئاستە گەورەکان فەرامۆش بکرێن".
بەپێی ڕاگەیەندراوەکە، زەیدی ڕایسپارد کە "پێداچوونەوە و وردبینی لە چۆنیەتی بەڕێوەچوونی پڕۆژەکاندا بکرێت، ئەمەش لە دیاریکردنی تێچووە خەمڵێندراوەکان و وردبینیکردنیانەوە دەستپێدەکات، کە قۆناغێکە پێویستە بە دەستپاکی و شەفافیەتەوە بەڕێوەبچێت؛ بە مەبەستی پاراستنی ماڵی گشتی".
زەیدی ئاماژەی بەوەش کرد، "سەرمایەداران و ئەو کۆمپانیایانەی لە پڕۆژەکانی پارێزگاکاندا کاریان کردووە، بانگهێشت دەکرێن بۆ بەشداریکردن لە پڕۆژەی (1) ملیۆن پارچە زەوی نیشتەجێبوون و ئامادەکردنی ژێرخانەکەی"، ڕوونیشی کردەوە کە "زیادەڕۆیی لە تێچووە خەمڵێندراوەکانی پڕۆژەکاندا هەیە و بە شێوەیەکی قبووڵنەکراو بەرزن، کە ڕەنگە بگاتە ئاستی دزین".
ڕاگەیەندراوەکە تیشکی خستە سەر ئەوەی کە "کۆبوونەوەکە شایەتی خستنەڕووی چەندین بابەتی گشتیی خاوەن گرنگیی باڵا بوو کە تایبەت بوون بە ئەدای دامەزراوە و فەرمانگە خزمەتگوزارییەکانی پارێزگاکان و ئەو دەسەڵاتانەی پێیان بەخشراوە، لەگەڵ گرنگیی هاوسەنگی لە نرخاندنی ئەو بەرهەمانەی لە جوتیاران وەردەگیرێن بە جۆرێک کە بەردەوامیی گەشەی کەرتی کشتوکاڵ مسۆگەر بکات، و پرسی گۆڕینی ڕەگەزی زەوییەکان، بەرزکردنەوەی ئاستی هەماهەنگی نێوان حکومەتە خۆجێییەکان و حکومەتی فیدراڵی، دانانی میکانیزم بۆ پێشخستنی کەرتی وزەی کارەبا بە هاوکاری لەگەڵ کۆمپانیا وەبەرهێنەرەکان، و شێوازەکانی زیادکردنی داهاتەکان و کەمکردنەوەی خەرجییەکان، لە پاڵ هاندانی وەبەرهێنان لە بوارە جیاوازەکاندا".