بەغدا - واع - ویسام مەلا
ئەمڕۆ دووشەممە، فەرمانگەی ڕێگاوبان و پردەکان، تەواوکردنی هەزار کیلۆمەتر لە ڕێگای نوێ و دروستکردنی 49 پردی لە سەرانسەری عێراقدا ڕاگەیاند.
بەڕێوەبەری گشتیی فەرمانگەکە، حوسێن موسەوی، بە ئاژانسی هەواڵی عێراقی (INA)ی ڕاگەیاند: "پڕۆژەکانی فەرمانگەی ڕێگاوبان و پردەکان سەرانسەری عێراق دەگرێتەوە، هەروەها فەرمانگەکە لەگەڵ هەندێک لە پارێزگاکاندا بەشدارە لە جێبەجێکردنی ژمارەیەک پڕۆژەدا"، و ڕوونی کردەوە کە "فەرمانگەکە لە ماوەی دوو ساڵی ڕابردوودا زیاتر لە 41 ڕێگای لە پارێزگا جیاجیاکاندا کردووەتەوە، کە ڕێگای پشتێنەیی (حەولی) شارەکان، دروستکردنی سایدەکانی دووەم و فرەوانکردنی ڕێگا سەرەکییەکانی ئێستای گرتووەتەوە".
ئەوەشی خستە ڕوو کە "کۆی گشتیی درێژیی ئەو ڕێگایانەی دروست کراون گەیشتووەتە نزیکەی هەزار کیلۆمەتر، لە کاتێکدا کارەکانی نۆژەنکردنەوە بۆ 58 ڕێگا ئەنجام دراون کە کۆی درێژییان گەیشتووەتە 1400 کیلۆمەتر".
ئاماژەی بەوەش دا کە "فەرمانگەکە 49 پردی بە درێژیی نزیکەی 40 کیلۆمەتر دروست کردووە، سەرەڕای نۆژەنکردنەوەی 43 پرد بە درێژیی نزیکەی 30 کیلۆمەتر"، و تیشکیشی خستە سەر "دروستکردنی حەوت ئەندەرباس (تونێل) بە درێژیی زیاتر لە سێ کیلۆمەتر".
ئاماژەی بەوەشکرد: "ئەم پڕۆژانە بەسەر ناوچە جیاجیاکانی عێراقدا دابەش کراون، ئەمەش بەپێی پێداویستی و ئەو پلانە لێکۆڵدراوانەی کە فەرمانگەکە ئامادەی کردوون".