بەدواداچوون - INA
ئەمڕۆ دووشەممە، وەزارەتی دەرەوەی ئێران، جەختی کردەوە کە بەیاننامەکەی یەکێتیی ئەورووپا نموونەیەکی زەقی سەرکۆنەکردنی ئەخلاقیی دووفاقییە، لە هەمان کاتدا ئاماژەی بەوە کرد کە لەسەر هیچ وردەکارییەک سەبارەت بە دۆسیەی ئەتۆمی دانوستاندنمان نەکردووە.
گوتەبێژی وەزارەتی دەرەوە، ئیسماعیل بەقایی ڕایگەیاند: "بەیاننامەکەی یەکێتیی ئەورووپا کە لۆمەی ئێران دەکات لەسەر بەرگریکردن لە خۆی، نموونەیەکی زەقی ھەڵبژاردنکارییە لە سەرکۆنەکردنی ئەخلاقیدا، و هەڵوێستی ئەورووپاش سیفەتی دووڕوویی و سەرەڕۆیی پێوە دیارە".
بەقایی داوای لە یەکێتیی ئەورووپا کرد کە "وەفادار بمێنێتەوە بۆ سەروەریی یاسا و بنەماکانی پەیماننامەی نەتەوە یەکگرتووەکان کە هەمیشە بانگەشەی پابەندبوونی پێوە دەکات، و دەستبەرداری ڕازیکردنی دەستدرێژیکاران بێت لە بەرامبەر لۆمەکردنی ئەو لایەنانەی کە وەڵامی هێرشە نایاساییەکان دەدەنەوە".
ئاماژەی بەوەش کرد کە "هێرشەکانی ئێران بۆ سەر ئەو بنکە و سەرمایانەی کە بۆ وەشاندنی هێرش دژی ئێران بەکاردێن، پەیڕەوکردنێکی یاساییە بۆ مافی بەرگریکردن لە خۆ".
ئاماژەی بەوەشکرد: "پێویستە دەوڵەتان پابەندبوونی یاسایی توندی خۆیان لەئەستۆ بگرن کە ڕێگە نەدەن خاک یان سەرمایەکانیان بۆ هێرشکردنە سەر وڵاتانی تر بەکاربهێنرێت".
لە وەڵامی لێدوانەکەی ترەمپیشدا سەبارەت بە لادانی یۆرانیۆم لە ئێران، بەقایی ڕایگەیاند: "لەسەر هیچ وردەکارییەک سەبارەت بە دۆسیەی ئەتۆمی دانوستاندنمان نەکردووە"، و ڕوونی کردەوە کە "ڕاگرتنی تەقە لە لوبنان بەشێکە لە هەر ڕێککەوتنێک بۆ کۆتاییهێنان بە جەنگ".