بەغداد- INA
ئەمڕۆ چوارشەممە، سەرۆکی ئەنجومەنی وەزیران عەلی فالح زەیدی، و سەرۆکی ئەنجومەنی نوێنەران هەیبەت حەلبووسی، جەختیان لەسەر گرنگیی بەردەوامبوونی گفتوگۆکان کردەوە بۆ تەواوکردنی پێکهاتەی حکومەت.
نووسینگەی ڕاگەیاندنی سەرۆکی ئەنجومەنی وەزیران لە بەیاننامەیەکدا کە بۆ ئاژانسی هەواڵی عێراقی ناردووە، دەڵێت:"سەرۆکی ئەنجومەنی وەزیران عەلی فالح زەیدی، پێشوازی لە سەرۆکی ئەنجومەنی نوێنەران هەیبەت حەمەد حەلبووسی کرد".
راشیگەیاند: "لە دیدارەکەدا بارودۆخی گشتیی وڵات تاوتوێ کرا، و جەخت لەسەر گرنگیی تەواوکاریی کارەکانی نێوان هەردوو دەسەڵاتی جێبەجێکردن و یاسادانان کرایەوە بۆ بەردەوامبوون لە دەرکردنی ئەو یاسایانەی کە پاڵپشتی لە جێبەجێکردنی ئەولەویەتەکانی بەرنامەی حکومەت دەکەن، و بەدیهێنانی خواستەکانی ڕۆڵەکانی گەلی عێراق".
بەپێی بەیاننامەکە، هەردوولا جەختیان کردووەتەوە لەسەر "پێویستیی یەکڕیزیی نیشتمانی و بەردەوامبوونی گفتوگۆ و لێکتێگەیشتنەکانی نێوان هێزە سیاسییەکان و پێشخستنی بەرژەوەندییە باڵاکانی نیشتمان، بە مەبەستی تەواوکردنی پێکهاتەی حکومەت و توانا بەخشین بە حکومەت بۆ ڕاپەڕاندنی ئەرکە دەستوورییەکانی، لەپێناو بەهێزکردنی ڕەوتی چاکسازی، گەشەپێدان و دابینکردنی خزمەتگوزارییەکان، بە شێوازێک کە وەڵامدەرەوەی پێداویستییەکانی قۆناغی ئێستا بێت".