بەغداد – INA
باڵیۆزی عێراق لە ویلایەتە یەکگرتووەکانی ئەمریکا نزار خەیروڵڵا، ئەمڕۆ چوارشەممە بۆ سیناتۆری کۆماریی ویلایەتی لویزیانا، بێڵ کسدی دووپاتکردەوە: حکومەتی نوێی عێراق ئامانجی بەهێزکردنی سەقامگیری و فراوانکردنی هاوکارییە هەرێمی و نێودەوڵەتییەکانە.
باڵیۆزخانەی عێراق لە واشنتن لە بەیاننامەیەکدا کە بۆ ئاژانسی هەواڵی عێراقی ناردووە، دەڵێت: "نزار خەیروڵڵا، باڵیۆزی عێراق لە ویلایەتە یەکگرتووەکانی ئەمریکا، چاوی کەوتووە بە بێڵ کسدی، سیناتۆری کۆماریی ویلایەتی لویزیانا و سەرۆکی لیژنەی تەندروستی، پەروەردە، کار و خانەنشینی، و ئەندامی لیژنەی وزە و سەرچاوە سروشتییەکان و چەند لیژنەیەکی تری ئەنجومەنی پیرانی ئەمریکا".
لە دیدارەکەدا، باڵیۆز "پێشهاتە سیاسی و ئابوورییەکانی عێراقی لە ژێر ڕۆشنایی ئەو گرژییانەی کە ناوچەکە بەخۆیەوەی دەبینێت خستەوڕوو"، هەروەها تیشکی خستە سەر "کارە لەپێشینەکانی حکومەتی نوێی عێراق و پلانەکانی بۆ بەهێزکردنی سەقامگیری، پێشخستنی گەشەپێدانی ئابووری، و فراوانکردنی ئاسۆکانی هاوکاری هەرێمی و نێودەوڵەتی".
بەیاننامەکە ئاماژەی بەوەشکردووە: هەردوولا "ئاسۆکانی هاوکاری نێوان عێراق و ویلایەتە یەکگرتووەکانیان تاوتوێ کرد، و بیروڕایان گۆڕییەوە سەبارەت بە چەند دۆسیەیەکی جێی بایەخی هاوبەش، بەتایبەتی بەهێزکردنی هاوبەشی لە بوارەکانی کشتوکاڵ، بازرگانی، هاوکاری زانستی، و کەرتی وزەدا".
لەلایەن خۆیەوە، سیناتۆر بێڵ کسدی "بایەخدانی خۆی بە عێراق و ئامادەیی بۆ پشتگیریکردنی ڕەوتی پەرەپێدانی پەیوەندییە دووڵایەنەکان" دەربڕی، و جەختی لە "خواستی خۆی بۆ سەردانیکردنی عێراق" کردەوە.
لەکۆتاییدا، باڵیۆز نزار خەیروڵڵا "ستایشی هەڵوێستەکانی سیناتۆری کرد لە پشتگیریکردنی بەهێزکردنی پەیوەندییەکانی عێراق و ئەمریکا، و پێشوازی لە خواستەکەی کرد بۆ سەردانیکردنی عێراق".