بەغداد – INA – فاتمە ڕەحمە
ئەمڕۆ سێشەممە، شانەی ڕاگەیاندنی ئەمنی دووپاتیکردەوە کە سیاسەتی ڕوونی عێراق لەسەر بنەمای دوورکەوتنەوە لە ململانێکان و تەرکیزکردن لەسەر جێگیرکردنی ئاسایشی ناوخۆیی دامەزراوە، هاوکات جەختیشی لەوە کردەوە کە سنوورەکانی عێراق بە تەواوی پارێزراون و ڕووبەڕووی هیچ کێشەیەکی ڕاستەقینە نابنەوە، و ئۆپەراسیۆنەکانی پشکنین لە بیابان و دەشتاییەکاندا بە بەردەوامی هەن.
سەعد مەعن، سەرۆکی شانەی ڕاگەیاندنی ئەمنی، بە ئاژانسی هەواڵی عێراقی (INA)ی ڕاگەیاند: "سیاسەتی عێراق ڕوونە لە دوورخستنەوەی خۆی لە بازنەی ململانێکان و تەرکیزکردن لەسەر چەسپاندنی ئاسایشێکی ناوخۆیی سەقامگیر"، ئاماژەی بەوەش کرد کە "سەردانەکەی ئەم دواییەی سەرۆک وەزیران، عەلی فالح زەیدی بۆ بارەگای فەرماندەیی ئۆپەراسیۆنە هاوبەشەکان، تەرکیزی خستووەتە سەر چەند خاڵێکی گرنگ، لە پێشەنگیاندا تەرکیزکردن لەسەر ئاسایشی ناوخۆ، بەهێزکردنی پەیوەندی لەگەڵ هاووڵاتیاندا، چالاککردنی هەوڵە هەواڵگرییەکان، سەرەڕای پشتبەستن بە شێوازە ئەمنییە هاوچەرخەکان کە لەگەڵ ڕۆحی سەردەمەکەدا دەگونجێن".
مەعن وتیشی: "ئەم ڕێنماییانە ڕوون و ڕاستەوخۆ بوون بۆ بەدواداچوونی سەرجەم کاروبارهکان، لەگەڵ جەختکردنەوە لەسەر دوورخستنەوەی عێراق لە بازنەی ململانێ و پاراستنی سەقامگیریی ناوخۆییەکەی"، هاوکات لە هەمان چوارچێوەدا ئاماژەی بەوە کرد کە "ئۆپەراسیۆنەکانی پشکنین لە بیابان و دەشتاییەکان و لە سەرجەم ئەم ناوچانەدا بێ وەستان بەردەوامن، وەک بەشێکی سەرەکی لە ئەرکەکانی فەرماندەییە ئەمنییەکان، فەرماندەییەکانی پۆلیس و لایەنە پێوەندیدارەکان لەوانەش هێزەکانی پاسەوانی سنوور".
ڕوونیشی کردەوە کە "دواین ئۆپەراسیۆنی سەربازی لە یەک کاتدا و لە شوێنی جیاوازدا لەسەر بنەمای سەردانە مەیدانییەکانی پشکنین دەستیپێکرد، و تێیدا گەڕانی دەورییەکان، ئۆپەراسیۆنەکان و بەدواداچوون و چاودێری ئاسمانی ئەنجامدران، بە هەماهەنگییەکی ئاستبەرز لەگەڵ سەرجەم فەرماندەییەکانی ئاژانسی هەواڵگری، ناوخۆ، بەرگری، ئاسایشی نیشتمانی، هەواڵگری و حەشدی شەعبی، سەرەڕای بەشداریی گرنگی فڕۆکەوانی سوپا لەم ڕووەوە لە ڕێگەی فڕۆکەکانی تەیارکردنەوە (دۆزینەوە)".
سەرۆکی شانەکە ئاماژەی بەوەش کرد کە "ئامانج لەم ئۆپەراسیۆنانە، چ ئەوانەی ئێستا، چ یان پێشووتر و داهاتووش، بڕینی ڕێگایە لە بەردەم گرووپە تیرۆریستییەکان یان باندەکانی قاچاخچێتی و ڕێگریکردنە لەوەی ناوچە دوورەدەستەکان بقۆزنەوە"، لە کۆتایی لێدوانەکەشیدا دووپاتیکردەوە کە "سنوورەکانی عێراق لەسەر وشکانی بە توندی پارێزراون، چ لە ڕێگەی ڕێوشوێنە ڕاستەوخۆکانی فەرماندەیی پاسەوانی سنوورەوە بێت یان لە ڕێگەی پاراستنی قووڵایی سنوورەکان کە لە لایەن سوپا و پێکهاتە ئەمنییەکانی دیکە و فەرماندەییەکانی پۆلیسەوە جێبەجێ دەکرێت"، ئاماژەی بەوەش کرد کە ئەم دۆسیەیە خاڵییە لە هەر کێشەیەکی ڕاستەقینە.