وەرزش – INA
زانایان و شارەزایانی نێودەوڵەتی هۆشداریی ڕاستەوخۆیان ئاراستەی یەکێتیی نێودەوڵەتیی تۆپی پێ "فیفا" کرد، بەو پێیەی ڕێکارەکانی ئێستا بەس نین بۆ ڕووبەڕووبوونەوەی ئەو شەپۆلە گەرمایانەی چاوەڕوان دەکرێت لە مۆندیالی ٢٠٢٦دا ڕوو بدەن.
پڕۆتۆکۆڵەکانی ئێستای "فیفا" پشت بە کاتێکی کورتی ساردکردنەوە دەبەستن کە سێ خولەکە لە هەر گێمێکدا، لەگەڵ تەرخانکردنی کورسی فێنککەرەوە بۆ یاریزانانی یەدەگ و دەستەی هونەری، ئەمەش شانبەشانی بەکارهێنانی پێوەری (WBGT) کە ئاستی ماندوێتی گەرما دەپێوێت لە ڕێگەی ئەژمارکردنی پلەی گەرما، شێ، تیشکی خۆر و خێرایی با.
بەڵام شارەزایانی تەندروستی و زانستی کەشوهەوا جەخت دەکەنەوە کە ئەم پێوەرانە چیتر لەگەڵ ڕاستی کەشوهەوای ئێستادا ناگونجێن.
لە نامەیەکی کراوەدا کە ٢٠ شارەزای ئەوروپا، ئەمریکای باکوور و ئوسترالیا واژۆیان کردووە، داوا لە "فیفا" کراوە ڕێکارەکانی سەلامەتی توندتر بکات، لە ڕێگەی دواخستن یان ڕاگرتنی یارییەکان کاتێک پێوەری ماندوێتی گەرما لە ٢٨ پلەی سەدی تێدەپەڕێت، لەبری ئەو سنوورەی ئێستای فیفا کە ٣٢ پلەیە. هەروەها داوایان کردووە کاتی ساردکردنەوە بۆ لایەنی کەم شەش خولەک درێژ بکرێتەوە و هۆکارەکانی فێنککەرەوە لە ناو یاریگاکاندا پەرەیان پێبدرێت.
لێکۆڵینەوە نوێیەکان ئاماژە بەوە دەکەن کە نزیکەی چارەکی یارییەکانی پاڵەوانێتییەکە ئەگەری هەیە لە بارودۆخێکی گەرمای مەترسیداردا ئەنجام بدرێن، لەگەڵ هەبوونی لایەنی کەم پێنج یاری کە دەگەنە ئاستێک کە پێشنیاری دواخستنیان دەکرێت بۆ پاراستنی سەلامەتی یاریزانان.
هەروەها ڕاپۆرتەکان هۆشدارییان داوە کە ١٤ یاریگا لە کۆی ١٦ یاریگای میواندار ڕووبەڕووی پلەی گەرمای بەرز دەبنەوە، بەتایبەتی لە شارەکانی وەک میامی، فیلادلفیا و کانساس سیتی، کە سیستمی فێنککەرەوەی تەواویان لە یاریگا کراوەکاندا نییە.
شاری میامی بە دیاریکراوی بووەتە جێی نیگەرانییەکی زۆری شارەزایان، چونکە مۆدێلە کەشوهەواییەکان پێشبینی دەکەن هەموو ئەو یارییانەی لەوێ ئەنجام دەدرێن، لە ئاستی ڕێگەپێدراوی ماندوێتی گەرما تێپەڕن. لە لایەکی دیکەوە، یاریی کۆتایی لە یاریگای "میتلایف" لە نیوجێرسی ڕووبەڕووی مەترسییەکی گەورە دەبێتەوە بەهۆی ئەگەری ئەنجامدانی یارییەکە لە ژێر گەرمایەکی زۆر بەرزدا.
هۆشدارییەکان تەنها بۆ یاریزانان نەبووە، بەڵکو هاندەرانیشی گرتووەتەوە؛ زانایان جەختیان کردووەتەوە کە سەدان هەزار هاندەر لەناو یاریگا و شوێنە کراوەکاندا ڕووبەڕووی مەترسی تەندروستی دەبنەوە، بەتایبەتی بەساڵاچووان و ئەوانەی نەخۆشی درێژخایەنیان هەیە. داواش کراوە وێستگەکانی ئاو و شوێنی سێبەر و فێنککەرەوە لەناو یاریگاکان و دەوروبەریان زیاد بکرێت.
لای خۆیەوە، فیفا جەختی کردووەتەوە کە تەندروستی یاریزانان و هاندەران لە پێشینەی کارەکانیانە و بەردەوام لێکۆڵینەوە لە مەترسییەکانی کەشوهەوا دەکەن لە چوارچێوەی پلانەکانیدا بۆ پاڵەوانێتییەکە، لەگەڵ ئەگەری گۆڕینی هەندێک ڕێکار بەپێی گۆڕانکارییەکانی کەشوهەوا.
بڕیارە مۆندیالی ٢٠٢٦ لە وڵاتانی ئەمریکا، کەنەدا و مەکسیک، لە ماوەی نێوان ١١ی حوزەیران تا ١٩ی تەمووز بەڕێوەبچێت.
سەرچاوە: ئاژانسەکان