کەربەلای پیرۆز - INA – عهباس رهحیمی
دەستەی شارۆچکە پیشەسازییەکان لە وەزارەتی پیشەسازی و کانزاکان ڕایگەیاند، ڕێژەی جێبەجێکردنی پڕۆژەی شارۆچکەی پیشەسازی لە کەربەلای پیرۆز گەیشتووەتە 67%.
ئەنەس هاشم عەبدولمەجید، سەرۆکی دەستەکە بە ئاژانسی هەواڵی عێراقی (INA)ی ڕاگەیاند: "گرێبەستی دروستکردن و پەرەپێدانی شارۆچکەیەکی پیشەسازی لە کەربەلا بە ڕووبەری پێنج هەزار و سێ سەد دۆنم سپێردراوە بە کۆمپانیایەکی کەرتی تایبەت، ئەمەش یەکەمین گرێبەستە بدرێتە کەرتی تایبەت بۆ دروستکردنی شارۆچکەیەکی پیشەسازی لە عێراق کە کارگەی پیشەسازییەکانی نەوت و پترۆکیمیاوی لەخۆدەگرێت."
وتیشی: "ڕێژەی جێبەجێکردن لە ئێستادا لە ژێرخانی شارۆچکەکەدا گەیشتووەتە 80%، بەڵام ڕێژەی گشتیی جێبەجێکردنی شارۆچکەکە گەیشتووەتە نزیکەی 67%."
عەبدولمەجید ڕوونی کردەوە کە "شارۆچکەکە لە ئێستادا باڵەخانەی کارگێڕی، باڵەخانەی بەبازاڕکردن، هۆتێل و باڵەخانە خزمەتگوزارییەکانی دیکەی وەک بەرگری شارستانی، بنکەی تەندروستی، تاقیگەکان و باڵەخانەی کێشانە (تەرازووی پردی) و چەندین باڵەخانەی جیاوازی دیکە لەخۆدەگرێت."
ئاماژەی بەوەش کرد کە بەرهەمهێنەران لەم شارۆچکەیەدا هەندێکیان ناوخۆیین و هەندێکی تریان وەبەرهێنەری بیانیین، زۆربەی پیشەسازییەکانیش نەوتی و پترۆکیمیاوین کە بەرهەمەکانیان دەخەنە بازاڕی ناوخۆوە و هەلی کار بۆ دانیشتووانی پارێزگاکە دەڕەخسێنن بە ڕێژەیەک کە دەگاتە زیاتر لە 25% و ڕەنگە بگاتە 50%ی ڕۆڵەکانی پارێزگاکە.
لە لایەکی دیکەوە، مەروان حەسەن، بەڕێوەبەری بەشی کاروباری تەکنیکی و ئەندازیاری لە دەستەی شارۆچکە پیشەسازییەکان بە (INA)ی ڕاگەیاند: "ئەم شارۆچکە پیشەسازییە یەکەم شارۆچکەیە کە تایبەتمەندە بە پیشەسازییەکانی نەوت و پترۆکیمیاوی و گرێبەستی پەرەپێدانی لەلایەن کەرتی تایبەتەوە واژۆ کراوە، بەبێ هیچ بەشدارییەک لە بودجەی گشتی یان پارەی وەزارەتی پیشەسازی، بەڵکو بەپێچەوانەوە بەشێک لە قازانجەکانی دەبێتە داهات بۆ بەرژەوەندی ئابووری نیشتمانی."
مەروان ڕوونی کردەوە کە شارۆچکە پیشەسازییەکەی کەربەلا چەندین دەستکەوت بۆ وڵات دابین دەکات، لەوانە ڕەخساندنی 40 بۆ 50 هەزار هەلی کار بۆ ڕۆڵەکانی پارێزگاکە، لەگەڵ نیشتەجێکردنی پیشەسازییەکان و ڕاکێشانی سەرمایەی بیانی و وەبەرهێنەران بۆ پارێزگاکە.
لە کۆتاییدا ئاماژەی بەوە کرد کە "ئێمە لە قۆناغی دووەمی پڕۆژەکەداین کە بریتییە لە دروستکردنی باڵەخانە خزمەتگوزارییەکان بەپێی پلانی بنەڕەتی، وەک باڵەخانەی کارگێڕی، هۆتێل، تاقیگەکان، بەرگری شارستانی و کارگەی قیر و چەندینی دیکە."