نێودەوڵەتی – INA
کۆشکی سپی ڕایگەیاند کە سەرۆک دۆناڵد ترامپ لە ٢٦ی ئایاردا لە ناوەندی سەربازیی "واڵتەر ڕید" پشکنینێکی پزیشکی ئەنجام دەدات، ئەمەش لە چوارچێوەی پشکنینە ساڵانە ئاساییەکانیدا.
ئەم پشکنینە چەند هەفتەیەک پێش ئەوە دێت کە ترامپ تەمەنی ببێتە ٨٠ ساڵ، بەوەش دەبێتە بەتەمەنترین سەرۆک لە مێژووی ئەمریکادا. بارودۆخی تەندروستی ئەو هەمیشە لەژێر چاودێرییەکی ورددا بووە، تەنانەت ترامپ خۆی پەشیمانی دەربڕی لە ئەنجامدانی تیشکی دڵ و سک لە ساڵی ڕابردوودا، چونکە پێی وابوو بووەتە هۆی دروستبوونی پرسیاری بێمانا دەربارەی تەندروستیی.
ئەمە دەبێتە چوارەمین سەردانی ڕاگەیەندراوی بۆ لای پزیشکان لەوەتەی گەڕاوەتەوە بۆ کۆشکی سپی، کە پشکنینی دانیش لە هەمان ناوەند دەگرێتەوە. سەرەڕای ڕەخنە بەردەوامەکانی لە جۆ بایدن، سەرۆکی پێشوو، بەهۆی کێشە تەندروستییەکانی پەیوەست بە تەمەنەوە، ترامپ هەمیشە جەخت لە چالاکیی و تەندروستیی خۆی دەکاتەوە.
دوێنێ دووشەممە لە نووسینگەی ڕێزڵ (Oval Office) ڕایگەیاند: "بە ڕاستی هەمان ئەو هەستەم هەیە کە پێنجا ساڵ لەمەوبەر هەبوو. نازانم بۆچی، نەک لەبەر ئەوەی باشترین جۆری خۆراک دەخۆم." هەفتەی ڕابردووش بە گاڵتەوە دەربارەی وەرزشکردنی وتی کە "تەنها یەک خولەک لە ڕۆژێکدا" وەرزش دەکات.
پزیشکەکەی، کاپتن شۆن بارابێلا، لە نیسانی ٢٠٢٥دا ڕایگەیاندبوو کە سەرۆک "بە تەواوی گونجاوە" بۆ خزمەتکردن، ئاماژەی بەوەش کردبوو کە ٢٠ پاوەند لە کێشی کەمی کردووە بەراورد بە پشکنینی ساڵی ٢٠٢٠ کە تێیدا لە لێواری قەڵەویدا بوو.
دوای چەند مانگێک لەو پشکنینە، ترامپ پشکنینێکی دیکەی ئەنجامدا بەهۆی بوونی "هەڵئاوسانێکی کەم" لە بەشی خوارەوەی قاچەکانیدا، دەرکەوت کە تووشی سستیی خوێنهێنەری درێژخایەن (chronic venous insufficiency) بووە، کە حاڵەتێکی باوە لەناو بەتەمەنەکاندا. هەروەها کارۆلین لیڤیت، سکرتێری ڕۆژنامەوانی، دەربارەی ئەو شینبوونەوەیەی سەر دەستەکانی سەرۆک کە هەندێکجار بە ماکیاژ دەشاردرێتەوە، ڕایگەیاند کە بەهۆی تەوقەکردنی زۆر و خواردنی ئەسپرینە کە بۆ خۆپاراستن لە جەڵتەی دڵ و مێشک بەکاری دەهێنێت.
لە تشرینی یەکەمی ڕابردووشدا، ترامپ پشکنینێکی جەستەیی "شەش مانگیی" ئەنجامدا و تێیدا ڤاکسینی ئەنفلۆنزا و ژەمی بەهێزکەری کۆڤید-١٩ی وەرگرت. دواتر ئاشکرای کرد کە لە هەمان کاتدا پشکنینی پێشکەوتووی بۆ دڵ و سکی ئەنجامداوە وەک ڕێکارێکی خۆپارێزی. پێشتر و لە خولی یەکەمی سەرۆکایەتیدا، لانی کەم چوار پشکنینی پزیشکی ئەنجامداوە، جگە لە مانەوەی لە واڵتەر ڕید کاتێک لە تشرینی یەکەمی ٢٠٢٠ تووشی کۆڤید بوو.