بەغدا – INA – ئامنە سەلامی
ئەمڕۆ دووشەممە، ئەمانەتی بەغدا، بەردەوامیی نۆژەنکردنەوە و پەرەپێدانی ژمارەیەک لە شەقامە سەرەکییەکانی پشتڕاستکردەوە، لە هەمان کاتدا ئاماژەی بە سەپاندنی غەرامە کرد کە دەگاتە 1 ملیۆن دینار بۆ هەر کەسێک بەبێ رەزامەندی فەرمی رێگری دەستکرد (تەپۆڵکە) دابنێت.
عودەی جەندیل، وتەبێژی ئەمانەتی بەغدا بە ئاژانسی هەواڵی عێراقی (INA)ی راگەیاند: "رێکاری تایبەت بە ئەمانەتی بەغدا هەیە بەتایبەت بۆ ئەو رێگایانەی کە کارەکانیان تەواو دەکرێت و قیرتاو دەکرێن و بەتەواوی پەرەیان پێدەدرێت، بەو پێیەی لە ماوەی ساڵانی ڕابردوودا کارەکانی پەرەپێدان و نۆژەنکردنەوە بۆ چەندین شەقامی سەرەکی ئەنجامدراوە، کە زیاتر لە 18 ملیۆن و نیو مەتر دووجا بووە لە ماوەی 2 ساڵی رابردوودا".
ئاماژەی بەوەشکرد: "شەقامی سەرەکی گرنگ هەن کە لە چوارچێوەی پلانی نەهێشتنی جەنجاڵی هاتووچۆدا فراوان کراون، کارەکانی پەرەپێدانیش دووبارە قیرتاوکردنەوە و پەرەپێدانی دوورگەکانی ناوەڕاست و رووناککردنەوە و رازاندنەوە و دابینکردنی هێماکانی هاتووچۆیان گرتووەتەوە".
ئەوەشی خستە ڕوو، کە "هەندێک جار حاڵەتی تێکدان لەم شەقامانەدا روودەدات لە ڕێگەی دروستکردنی رێگری دەستکرد (تەپۆڵکە) لەلایەن هەندێک لە هاوڵاتیانەوە، ئەمەش دەیانخاتە بەر لێپرسینەوەی یاسایی و غەرامەیەک کە دەگاتە 1 ملیۆن دینار".
ئاماژەی بەوەش کرد، "هەر کەسێک دەستکاری شەقامەکان بکات، بەتایبەت ئەو شەقامانەی کە لەم دواییانەدا پەرەیان پێدراوە، بە غەرامەی یاسایی راوەدوو دەنرێت، لەوانەش دانانی رێگری دەستکرد بەبێ وەرگرتنی رەزامەندی فەرمی لە فەرمانگە شارەوانییەکان".
جەختیشی کردەوە کە "هاوڵاتیان دەتوانن پەیوەندی بە فەرمانگە شارەوانییەکانەوە بکەن بۆ دروستکردنی رێگری دەستکرد لە شوێنە دیاریکراو و دەستنیشانکراوەکان، و دروست نییە بۆ هاوڵاتی کە لە شەقامە سەرەکییەکاندا رێگری دەستکرد دروست بکات، بەتایبەت دوای کارەکانی پەرەپێدان و نۆژەنکردنەوە"، ئاماژەی بەوەش کرد "غەرامەی 1 ملیۆن دینار بەسەر سەرپێچیکاراندا جێبەجێ دەکرێت بۆ هەر کەسێک کە دەستکاری ئەم شەقامانە بکات".