نێودەوڵەتی – INA
نێردەی ڕووسیا لە نەتەوە یەکگرتووەکان ناڕەزایەتی خۆی نیشان دا بەرامبەر بەوەی ناوی برد بە "پڕۆژەبڕیاری نەیارانە" لە ناو ئەنجومەنی ئاسایشی نێودەوڵەتی، و هۆشداری دا کە پەسەندکردنی بڕیاری یەکلایەنە ڕەنگە ببێتە هۆی شەپۆلێکی نوێی گرژی و ئاڵۆزی لە ناوچەی ڕۆژهەڵاتی ناوەڕاست.
نێردەی ڕووسیا لە میانی پێشکەشکردنی زانیارییەکانی لەبەردەم ئەنجومەنی ئاسایش جەختی کردەوە، کە مۆسکۆ هەڵوێست و نیگەرانییە بنەڕەتییەکانی خۆی سەبارەت بەو پڕۆژەبڕیارەی خراوەتە بەردەم ئەنجومەنی ئاسایش ڕوون کردووەتەوە. ئاماژەی بەوەش کرد کە ئازادیی کەشتیوانی لە کەنداوی عەرەبی بە تەواوی ناگەڕێتەوە مەگەر بە کۆتاییهاتنی ململانێکان و ڕاگرتنی کردەوە جەنگییەکان.
هەروەها نێردەکە ڕایگەیاند کە ڕووسیا پاڵپشتی ئەو هەوڵانە ناکات کە دەیانەوێت "زمانێکی ناهاوسەنگ" بەرامبەر بە ئێران بەکاربهێنن، و پێی وایە هەندێک لەو پێشنیارانە هۆکارە ڕاستەقینەکانی تەنگژەکەیان پشتگوێ خستووە.
وتیشی: ڕووسیا و چین لە ٧ی نیساندا ڕێگرییان کردووە لە پەسەندکردنی پڕۆژەبڕیارێک سەبارەت بە گەرووی هورمز، و پڕۆژەیەکی جێگرەوەیان پێشکەش کردووە کە داوای کۆتاییهێنان بە شەڕ و چارەسەرکردنی ناکۆکییەکان لە ڕێگەی گفتوگۆ و چارەسەری دیپلۆماسییەوە دەکات.