حەلبوسی: پەرلەمان ئەمڕۆ یان سبەی کارنامەی حکومەت لە سەرۆک وەزیرانی ڕاسپێردراو وەردەگرێت

بەغداد – INA

ئەمڕۆ چوارشەممە، هەیبەت حەلبوسی سەرۆکی ئەنجومەنی نوێنەران، ڕایگەیاند: ئەنجومەن ئەمڕۆ یان سبەی پێنجشەممە کارنامەی حکومەت کە لەلایەن عەلی زەیدی سەرۆک وەزیرانی ڕاسپێردراو پێشکەشکراوە، وەردەگرێت.

فەرمانگەی ڕاگەیاندنی ئەنجومەنی نوێنەران لە بەیاننامەیەکدا کە بۆ ئاژانسی هەواڵی عێراقی ناردووە، ڕایگەیاند: "ئەنجومەنی نوێنەران لە بیست و سێیەمین دانیشتنی خۆیدا کە ئەمڕۆ چوارشەممە بە سەرۆکایەتی هەیبەت حەلبووسی بەڕێوەچوو، خوێندنەوەی بۆ دوو پێشنیازی یاسا کۆتایی پێهێنا."

بەپێی بەیاننامەکە، حەلبووسی لە دەسپێکی دانیشتنەکەدا ئاماژەی بەوە کردووە: "ئەنجومەنی نوێنەران لە ماوەی ئەمڕۆ یان سبەی پێنجشەممەدا، کارنامەی حکومەت کە لەلایەن عەلی زەیدی، سەرۆکی ئەنجومەنی وەزیرانی ڕاسپێردراو پێشکەش کراوە، وەردەگرێت بۆ ئەوەی بەسەر ئەندامانی ئەنجومەندا دابەش بکرێت بە مەبەستی لێکۆڵینەوە و ئاگاداربوون لێی."

بەیاننامەکە دەڵێت: "سەرۆکی ئەنجومەنی نوێنەران، لیژنەی یاسایی پەرلەمانی ڕاسپارد بۆ دەربڕینی ڕای یاسایی خۆی سەبارەت بە پیادەکردنی ئەرکەکانی سەرۆک و ئەندامانی ئەنجومەنی خزمەتی فیدراڵی پێش ئەوەی سوێندی دەستووری لەبەردەم ئەنجومەنی نوێنەراندا بخۆن."

هەروەها هاتووە: "ئەنجومەن خوێندنەوەی یەکەمی بۆ پێشنیازی یاسای تەندروستی دەروونی تەواو کرد کە لەلایەن لیژنەی تەندروستی و بەرەنگاربوونەوەی ماددە هۆشبەرەکان و کارتێکەرە عەقڵییەکانەوە پێشکەش کرابوو، کە ئامانجی بەرزکردنەوەی ئاستی خزمەتگوزارییە تەندروستییە دەروونییەکان و کوالێتییانە لە عێراق و گونجاندنیان لەگەڵ پێوەرە نێودەوڵەتییەکان، ئەویش لە ڕێگەی پەرەپێدانی ڕێگاکانی چارەسەرکردن و ڕێزگرتن لە مافی نەخۆشە دەروونییەکان و پەرەپێدانی توانای کارمەندانی بواری تەندروستی دەروونی و چالاککردنی ڕۆڵی دامەزراوە چارەسەرییەکان و پێدانی دەرماڵە بۆ هاندانی کارکردن لە پزیشکی دەروونیدا."

بەیاننامەکە ئاماژەی بەوەشکردووە: "ئەنجومەن لەو دانیشتنەدا کە عەدنان فەیحان، جێگری یەکەمی سەرۆکی ئەنجومەن سەرۆکایەتی بەشێکی کرد، خوێندنەوەی یەکەمی بۆ پێشنیازی یاسای هەموارکردنی یەکەمی یاسای کار ژمارە (٣٧)ی ساڵی ٢٠١٥ دواخست، کە لەلایەن لیژنەی کار و دامەزراوەکانی کۆمەڵگەی مەدەنی و خزمەتی گشتی فیدراڵی و لاوان و وەرزش و ڕۆشنبیری و گەشتوگوزارەوە پێشکەش کرابوو."

ئەوەشی خستەڕوو: "ئەنجومەن خوێندنەوەی یەکەمی بۆ پێشنیازی یاسای زانکۆی عێراق بۆ زانستە ئەمنییەکان تەواو کرد کە لەلایەن لیژنەی ئاسایش و بەرگرییەوە پێشکەش کرابوو، کە بۆ دابینکردنی بنکەیەک لە کادیری زانستی و ئەمنی و هاوشانبوونی گەشەسەندن لە پسپۆڕییە جیاوازەکانی زانستە ئەمنییەکان و زانستە پەیوەندیدارەکان و ئاڵوگۆڕی زانیاری و ئاگاداربوون لە دوایین پێشهاتەکان لەم بوارەدا هاتووە، هەروەها بۆ دامەزراندنی دامەزراوەیەکی ئەکادیمیی زانستیی ئەمنی."