بەغداد - INA - محەمەد تاڵبی
ڕاوێژکاری سەرۆک وەزیران بۆ کاروباری ئاو تورهان موفتی، ئەمڕۆ چوارشەممە جەختی لە بوونی هەماهەنگی لە بەرزترین ئاستدا لەگەڵ تورکیا لە مەلەفی ئاودا کردەوە، ئاماژەی بەوەشکرد: یاداشتی هاوکاری لەگەڵ تورکیا کارایە و تەنها پێویستی بە دەنگدانی ئەنجومەنی وەزیران هەیە، و هاوکارییەکی بەرهەمدار لەم بوارەدا لە ئارادایە.
موفتی بە ئاژانسی هەواڵی عێراقی ڕاگەیاند: "یاداشتی چوارچێوەی هاوکاری لەگەڵ تورکیا پشت بە میکانیزمی جێبەجێکردنی پڕۆژەکان دەبەستێت"، ڕوونیشیکردەوە: "میکانیزمەکە لە ئەنجومەنی وەزیران دەنگی لەسەر نەدراوە؛ بەهۆی چوونە ناو قۆناغی کاربەڕێکەری حکومەتەوە".
زیاتر وتی: "پەیوەندی نیمچە ڕۆژانە هەیە سەبارەت بە بەردانەوەی ئاو لەگەڵ لایەنی تورکی"، ئاماژەی بەوەشکرد کە "پەیوەندییەکان بۆ گونجاندن و وەرگرتنی ئەو بڕە ئاوە زۆرەیە کە بەردەدرێتەوە".
سەبارەت بە یاداشتنامەکانی نێوان هەردوو وڵات، ڕاوێژکاری سەرۆک وەزیران ڕوونیکردەوە: "یاداشتی یەکەم لەگەڵ لایەنی تورکی کە لەلایەن سەرۆک وەزیران و سەرۆک کۆماری تورکیاوە واژۆ کراوە، کارایە و چووەتە بواری جێبەجێکردنەوە. یاداشتی دووەم (میکانیزمی جێبەجێکردن) کە لەلایەن وەزیرانی دەرەوەی هەردوو وڵاتەوە واژۆ کراوە، ئەویش کارایە و پێویستی بە دەستپێکردنی ڕێکارە کردەییەکان هەیە دوای ئەوەی لە ئەنجومەنی وەزیران دەنگی لەسەر دەدرێت".
وتیشی: "زیادبوونی بەردانەوەی ئاو لە ئێستادا لە هەردوو ڕووباری دیجلە و فورات هەیە، بەڵام لەسەر دیجلە زیاترە؛ بەهۆی زۆری بارانبارین و توانەوەی بەفرەوە".
موفتی ئاماژەی بەوەشکرد: "هەماهەنگی لەگەڵ تورکیا لە بەرزترین ئاستدایە سەبارەت بە بەردانەوەی ئاو، ئەمەش دوای دووبارە بنیاتنانەوەی متمانە لە نێوان هەردوو وڵاتدا لە ماوەی ساڵانی ڕابردوودا".