بەغداد - INA - محەمەد تاڵبی
وەزارەتی کشتوکاڵ، ئەمڕۆ چوارشەممە، گرنگیی گۆڕانکاری بەرەو شوێنپێهەڵگرتنی دیجیتاڵی بۆ گواستنەوەی ئاژەڵی زیندوو و بەرهەمەکانیان ڕوونکردەوە.
میساق عەبدولحسێن خەفاجی، بریکاری تەکنیکی وەزارەت بە ئاژانسی هەواڵی عێراقی، ڕاگەیاند: "گۆڕان بەرەو شوێنپێهەڵگرتنی دیجیتاڵی بۆ گواستنەوەی ئاژەڵی زیندوو و بەرهەمەکانیان، هەنگاوێکی ستراتیژیی میحوەرەییە لە پەرەپێدانی سیستمی ئاسایشی بایۆلۆژی و خۆراکیدا." ئاماژەی بەوەشکرد: "پشت بەستن بە سیستمە دیجیتاڵییە یەکگرتووەکان، ڕێگە دەدات هەموو قۆناغەکانی زنجیرەی بەرهەمهێنان تۆمار بکرێن؛ لە کێڵگەوە تا دەگاتە گواستنەوە و بەبازاڕکردن و دواجار گەیشتن بە دەستی کڕیار، ئەمەش ڕوونیی سەرچاوە و سەلامەتی ڕێکارەکان لە هەموو ئەڵقەکانی ئەم زنجیرەیەدا مسۆگەر دەکات."
خەفاجی باسی لەوەشکرد: "ئەم گۆڕانکارییە بە شێوەیەکی ڕاستەوخۆ توانای لایەنە ڤێتێرنەری و چاودێرییەکان بەهێز دەکات بۆ وەڵامدانەوەی خێرای هەر حاڵەتێکی کتوپڕی تەندروستی، ئەوەش لە ڕێگەی دەستنیشانکردنی وردی سەرچاوەی پێکان یان پیسبوون و گۆشەگیرکردنی لە کاتێکی پێوانەییدا، ئەمەش زیانە ئابوورییەکان کەمدەکاتەوە و ڕێگری لە بڵاوبوونەوەی نەخۆشییە فرە سنوورەکان دەکات. هەروەها دەبێتە هۆی کەمکردنەوەی حاڵەتەکانی فێڵکردن، وەک قاچاخچێتی ئاژەڵ یان مامەڵەکردن بە بەرهەمە بێ چاودێرییەکان، لە ڕێگەی بەڵگەنامەی ئەلیکترۆنییەوە کە بە ئاسانی دەستکاری ناکرێت."
جەختیشیكردەوە: "لە ڕووی ئابوورییەوە، بەدیجیتاڵکردنی ڕێکارەکان بەشدار دەبێت لە سادەکردنەوە و خێراکردنی پرۆسەی پێدانی مۆڵەت و بڕوانامە تەندروستییەکان، کەمکردنەوەی بیرۆکراسی و بەرزکردنەوەی ئاستی هەماهەنگی نێوان لایەنە پەیوەندیدارەکان، ئەمەش کاریگەری ئەرێنی دەبێت لەسەر ئاسانی جوڵەی بازاڕ و جێگیربوونی نرخەکان." لایەنێکی تریشی خستەڕوو: "ئەم سیستمە ئاسۆی فراوانتر بۆ هەناردەکردن دەکاتەوە، لە ڕێگەی پابەندبوون بە پێوەرە نێودەوڵەتییەکان کە مەرجی شەفافیەت و توانای شوێنپێهەڵگرتنیان تێدایە، ئەمەش متمانەی هاوبەشە بازرگانییەکان بە بەرهەمی نیشتمانی بەرز دەکاتەوە."
بریکاری وەزارەت ڕوونیکردەوە: "ئەم سیستمە داتابەیسێکی نیشتمانیی ورد و نوێکراوە دابین دەکات و دەبێتە کۆڵەکەیەکی سەرەکی بۆ پەرەپێدانی کەرتی کشتوکاڵی لە بەشی ئاژەڵداریدا." وتیشی: "بڕیار بەدەستان دەتوانن شیکردنەوە بۆ جوڵەی بەرهەمهێنان، شێوازەکانی بەکاربردن و ڕێڕەوەکانی بەبازاڕکردن بکەن، ئەمەش ئەنجامدانی توێژینەوەی واقعیی بازاڕ و پشتگیریکردنی پلاندانانی ستراتیژی و ئاراستەکردنی وەبەرهێنانەکان بەرەو سێکتەرە پڕسوودەکان ئاسان دەکات."
خەفاجی دەڵێت: "هەر پڕۆژەیەکی سەرکەوتووی بەدیجیتاڵکردن بە شێوەیەکی پلەبەندی و لێکۆڵینەوەکراو دەست پێ دەکات، لە ڕێگەی تاقیکردنەوە لە ناوچە یان کەرتە دیاریکراوەکاندا، پاشان قۆناغ بە قۆناغ فراوان دەکرێت بۆ هەموو وڵات. هەروەها پێویستە ببەسترێتەوە بە پلاتفۆرمە خزمەتگوزارییەکانی ترەوە، وەک سیستمی مۆڵەتەکان، دەروازە سنوورییەکان و خزمەتگوزارییە ڤێتێرنەرییەکان، بۆ بەدیهێنانی تەواکارییەکی دیجیتاڵی گشتگیر کە کارایی حکومەت بەرزبکاتەوە و خزمەتگوزاری شەفافتر و خێراتر پێشکەش بە هاووڵاتیان و کەرتی تایبەت بکات."
لە کۆتاییدا وتی: "شوێنپێهەڵگرتنی دیجیتاڵی و بەدیجیتاڵکردنی ڕێکارەکان تەنها بەرهەمی تەندروست و سەلامەت و ناسراو لە ڕووی سەرچاوەوە (لە کێڵگەوە بۆ سەر مێزی نانخواردن) دابین ناکەن، بەڵکو بناغەی کەرتێکی کشتوکاڵیی سەردەمیانەی پشتبەستوو بە داتا دادەڕێژن، کە توانای ڕووبەڕووبوونەوەی تەحەدییە تەندروستی و ئابوورییەکانی هەبێت بە کارایی و بەردەوامی."