بەغدا - INA
شارەوانی بەغدا، ئەمڕۆ سێشەممە، ڕایگەیاند کە هەنگاوی گەورەیان بڕیوە لە دۆسیەی ئاسانکاری ڕێکارە حکومییەکان لە ڕێگەی گۆڕینی مامەڵە کاغەزییەکان بۆ ئەلیکترۆنی، جەختیشی کردەوە کە سیستەمی نوێی مۆڵەتەکان کۆتایی بە کردەوەکانی گەندەڵی و سەرانەستاندن هێناوە، و داواکردنی مۆڵەتەکە بە ئەلیکترۆنی دەبێت و مامەڵەکە تەنها یەک هەفتەی دەوێت.
عەدی جەندیل، وتەبێژی شارەوانی بەغدا بە ئاژانسی هەواڵی عێراقی (INA )ی ڕاگەیاند: "شارەوانی بەغدا سەرکەوتوو بوو لە بە دیجیتاڵکردنی دەرکردنی مۆڵەتەکانی بیناسازی بە تەواوی لە ڕێگەی دەروازەی (ئور)ی ئەلیکترۆنییەوە، ئەمەش وایکردووە هاووڵاتی پێویستی بە سەردانیکردنی فەرمانگە شارەوانییەکان نەمێنێت مەگەر تەنها لە قۆناغی دانی ڕسووماتەکاندا"، ئاماژەی بەوەش کرد کە "ئەم هەنگاوە بە شێوەیەکی ڕاستەوخۆ ئامانجی بنبڕکردنی سەرانەستاندن و مامەڵەپێکردن بووە کە پێشتر لە کاتی پەیوەندی ڕاستەوخۆی نێوان فەرمانبەر و هاووڵاتی ڕوویان دەدا".
جەندیل وتیشی: "خزمەتگوزارییەکە مۆڵەتەکانی نیشتەجێبوون، بازرگانی و پیشەسازی دەگرێتەوە، بەجۆرێک هاووڵاتی دەتوانێت بەڵگەنامەکان و سەندی نوێ پێشکەش بکات و لە ڕێگەی مۆبایلەکەیەوە بەدواداچوون بۆ قۆناغەکانی مامەڵەکەی بکات، کە پرۆسەکە زیاتر لە هەفتەیەک ناخایەنێت"، ئاماژەی بەوەش دا کە "دەروازەکە خزمەتگوزاری دیکەی وەک گۆڕینی ناوی بەشداربوو لە پسوولەکانی باج و داواکاری بەستنی پێوەری ئاو بەبێ پێویستی بە ئامادەبوونی کەسیی دابین دەکات".
سەبارەت بە دۆسیەی دابەشکردنی زەوییەکان بە ڕووبەری بچووک، جەندیل جەختی کردەوە کە "شارەوانی پابەندە بە یاسا کارپێکراوەکان (بڕیاری ٢٩٦ و یاساکانی ١٣ و ٦٧) و ناتوانێت مۆڵەتی بیناسازی بدات بەو ڕووبەرانەی لەوە کەمترن کە یاسا دیاری کردووە (وەک ٥٠ و ٧٥ مەتر)، مەگەر هەموارکردنەوەی یاسایی لەلایەن لایەنە پەیوەندیدارەکانەوە بکرێت"، ئاماژەی بەوەش کرد کە "میکانیزمی دیاریکراو بۆ پێدانی قەرزی نیشتەجێبوون هەیە کە پێویستی بە یەکخستنی پشکەکان یان وازهێنان لە نێوان هاوبەشەکاندا هەیە بۆ گەیشتن بە کەمترین ڕووبەر کە ١٠٠ مەتر دووجایە بۆ سوودمەندبوون لە قەرزەکە بەپێی ڕێنماییەکان".