بەغدا - INA
ئەمڕۆ دووشەممە، سەرۆکی ئەنجومەنی وەزیران، محەمەد شیاع سودانی، سەرەخۆشی لە کەسوکاری قوربانییانی ڕووداوێکی هاتووچۆ کرد کە لە پارێزگای کەرکووک ڕوویدا، هاوکات ڕاسپاردەی دا بۆ پاڵپشتیکردنی خێزانی قوربانییان.
نووسینگەی ڕاگەیاندنی سەرۆکی ئەنجومەنی وەزیران لە ڕاگەیەندراوێکدا کە دەستی ئاژانسی هەواڵی عێراقی (INA) کەوتووە، ڕایگەیاند: "بە خەم و پەژارەیەکی زۆرەوە، سەرۆکی ئەنجومەنی وەزیران محەمەد شیاع سودانی، هەواڵی ڕووداوێکی دڵتەزێنی هاتووچۆی لە پارێزگای کەرکووک پێگەیشت کە بووە هۆی گیانلەدەستدان و برینداربوونی چەندین کەس، و سەرەخۆشی قووڵی خۆی ئاراستەی خێزانی قوربانییان کرد و هیوای چاکبوونەوەی خێرای بۆ بریندارەکان خواست".
بەپێی ڕاگەیەندراوەکە، سەرۆک وەزیران لایەنە پەیوەندیدارەکانی ڕاسپارد "بۆ پەیوەندیکردن بە خێزانی قوربانییان و بریندارەکان و پێشکەشکردنی پاڵپشتی و چاودێری پێویست، و گرتنەبەری سەرجەم ڕێکارە یاساییەکان".
سودانی جەختی کردەوە لەسەر "پێویستی دوپاتکردنەوە و دڵنیابوونەوە لە مەرجەکانی سەلامەتی و ئاسایش، و جێبەجێکردنی یاسا و ڕێنماییەکانی هاتووچۆ بۆ دڵنیابوون لە دووبارەنەبوونەوەی ئەم جۆرە ڕووداوە ناخۆشانە".