پارێزگاری بەغدا بەردی بناغەی پڕۆژەی تۆڕی ئاوەڕۆی لە ناوچەی کوێریش دانا

بەغدا – INA – حەسەن فەواز

عەتوان ئەلعەتوانی، پارێزگاری بەغدا، ئەمڕۆ پێنجشەممە بەردی بناغەی پڕۆژەی تۆڕی ئاوەڕۆی لە ناوچەی کوێریش دانا، هاوکات ماوەی تەواوکردنی پڕۆژەکەی دیاری کرد.

عەتوانی بە ئاژانسی هەواڵی عێراقی (INA)ی ڕاگەیاند: نزیکەی شەش مانگ لەمەوبەر بەڵێنێکمان بە خۆمان دا؛ یەکەمیان ئەوەبوو ناوچەی کوێریش سەر بە ناحیەی ڕەشید تۆڕی ئاوەڕۆ دەیگرێتەوە و ئەوەش هاتە دی، بەڵێنی دووەمیش وادەی دەستپێکردن بوو کە بڕیار بوو لە کۆتایی ساڵی ٢٠٢٥دا بێت، بەڵام وادەکە بەهۆی هەندێک هۆکاری دەرەوەی ئیرادەی خۆمان بۆ ماوەی چوار مانگ دواکەوت.

وتیشی: ئەم پڕۆژەیە یەکێکە لە پڕۆژە ستراتیژییە گرنگەکان، چونکە پڕۆژەکانی پارێزگای بەغدا بە گشتی و پڕۆژەکانی ئاوەڕۆ بەتایبەتی، بەوە جیادەکرێنەوە کە پڕۆژەی تەواوکارن و تۆڕی ئاوەڕۆ و تۆڕی ئاوی باران لەخۆدەگرن، لەوەش گرنگتر بوونی وێستگەکانی پاڵاوتنە."

ئاماژەی بەوەش کرد کە ماوەی تەواوکردنی پڕۆژەکە ٩٠٠ ڕۆژە و لە هەموو لایەکەوە پڕۆژەیەکی گشتگیرە، ئەمڕۆش بە دانانی بەردی بناغە ئاهەنگ دەگێڕین، کە پێشتر هەوڵێکی زۆر لەلایەن هەموانەوە بۆ دراوە، بەتایبەت ئەندامانی ئەنجومەنی پارێزگا کە بەردەوام بەدواداچوونیان بۆ پڕۆژەکە کردووە و لەگەڵ دامەزراوەکانی دیکە وەک وەزارەتەکانی پلاندانان و دارایی لە پەیوەندیدا بوون بۆ ئەوەی بخرێتە ناو پلانی پارێزگاوە،هیوایشی خواست پڕۆژەکە پێش وادەی دیاریکراو تەواو بێت.

ڕوونیشیکردەوە کە هەوڵی هاووڵاتیان و تێگەیشتنیان بۆ سروشتی پڕۆژەکە و هاوکارییان بۆ کۆمپانیای جێبەجێکار، فاکتەرێکی سەرەکییە لە تەواوکردنی ئەم پڕۆژەیەدا، لە پاڵ ڕۆڵی گەورەی پارێزگا لە ڕێگەی بەدواداچوون و چاودێریکردن بەپێی تایبەتمەندییە پەسەندکراوەکان