بەغدا – INA– حەسەن فەواز
وەزارەتی کارەبا، ئەمڕۆ پێنجشەممە، جەختی لە سەقامگیریی کاتژمێرەکانی دابینکردنی کارەبا بۆ هاووڵاتیان کردەوە، هاوکات ئاماژەی بەوە کرد کە هەوڵی بەردەوام لەگەڵ وەزارەتی نەوت هەیە بۆ قەرەبووکردنەوەی کەمیی گازی نیشتمانی و دۆزینەوەی جێگرەوەکان.
ئەحمەد مووسا، وتەبێژی وەزارەت بە ئاژانسی هەواڵی عێراقی (INA)ی ڕاگەیاند: کاتژمێرەکانی دابینکردنی کارەبا بۆ هاووڵاتیان سەقامگیرییەکی ڕوونیان بەخۆوە بینیوە، ئەمەش لە ئەنجامی ئامادەکارییەکانی وەزارەت لە ڕێگەی ئامادەکردنی وێستگەکانی بەرهەمهێنان و هێڵەکانی گواستنەوە و کارکردنی بەردەوام بۆ ئامادەکردنی تۆڕەکانی دابەشکردن.
وتیشی: ئەو فاکتەرە گرنگانەی یارمەتیدەری سەقامگیریی سیستەمی کارەبا بوون، بریتی بوون لە پلەکانی گەرمای مامناوەند لە کەشوهەوای عێراقدا، جگە لە دەستپێکردنەوەی ناردنی گازی ئێرانی بە بڕی ٢١ ملیۆن مەتر سێجا، کە ڕێژەیەکی باشە، و چاودێری دەکەین ئەم ڕێژەیە بەرز بێتەوە لەگەڵ چوونە ناو لووتکەی بارگرانییەکانەوە.
ئاماژەی بەوەش کرد کە بەرهەمهێنانی گازی نیشتمانی بۆ زیاتر لە نیوە کەمیکردووە بەهۆی کەمکردنەوەی هەناردەی نەوت، بەڵام وەزارەتی کارەبا پێویستی بە بەرزکردنەوەی ئاستی گازی نیشتمانی هەیە، ڕوونیشیکردەوە کە هەوڵی بەردەوام لەگەڵ وەزارەتی نەوت هەیە بۆ دابینکردنی سووتەمەنی جێگرەوە و کارپێکردنی وێستگەکانمان بە گازۆیل ، جگە لە هەوڵەکانی وەزارەت بۆ تەواوکردنی سەکۆی گازی شل لە خۆر ئەلزوبێر.
تیشکی خستە سەر ئەوەی کە وەزارەتی کارەبا تا ئێستا کۆنتڕۆڵی بارگرانی و وێستگەکانی کردووە، و لەگەڵ چوونە ناو لووتکەی بارگرانییەکانەوە پێویستمان بە زیادکردنی ناردنی گازی ئێرانی و بەرزکردنەوەی بەرهەمهێنانی گازی نیشتمانی دەبێت، جەختیشی کردەوە کە کارەکان لە وەزارەتی کارەبا خێران بۆ هاوشانبوون لەگەڵ لووتکەی بارگرانییەکانی هاویندا