بەغداد- INA - ئەمنە سەلامی
مەزهەر محەمەد ساڵح، ڕاوێژکاری سەرۆک وەزیران، ئەمڕۆ چوارشەممە جەختیکردەوە: ئەو قسانەی سەبارەت بە وەستانی لێشاوی دۆلار لە ویلایەتە یەکگرتووەکانەوە بۆ عێراق دەکرێن، پەیوەندییان بە بەشێکی زۆر کەمەوە هەیە کە لە ٥٪ تێپەڕ ناکات، ئاماژەی بەوەشکرد: داواکاری لەسەر دۆلار بۆ دابینکردنی دارایی بازرگانی دەرەکی بە شێوەیەکی ئاسایی و بێ پچڕان بەڕێوەدەچێت.
ساڵح بە ئاژانسی هەواڵی عێراقی ڕاگەیاند: "جیاوازییەکی بنەڕەتی هەیە لە نێوان دۆلاری نەختینە (کاش) کە بۆ گەشتیاران لە ڕێگەی فڕۆکەخانەکانەوە تەرخانکراوە و سەقفەکەی نزیکەی ٣٠٠٠ دۆلارە بۆ هەر گەشتیارێک، و لە نێوان دابینکردنی دارایی بازرگانی دەرەکی کە لە ڕێگەی حەواڵە و سیستەمی بانکی جیهانییەوە ئەنجام دەدرێت"، ڕوونیشیکردەوە کە "ئەوەی لە هەندێک ناوەنددا دەوترێت دەربارەی وەستانی لێشاوی دۆلار لە ویلایەتە یەکگرتووەکانەوە بۆ عێراق، پەیوەندی بە بەشێکی زۆر سنوورداری داواکاری لەسەر دۆلارەوە هەیە کە لە ٥٪ تێپەڕ ناکات، ئەویش پەیوەستە بە دابینکردنی پێداویستی گەشتیاران بە نەختینە".
زیاتر وتی: "ئەم بەشە کەوتووەتە ژێر کاریگەری هۆکاری لۆجیستی پەتی، کە دیارترینیان سنوورداریی جوڵەی فڕۆکەوانی و داخرانی زۆربەی فڕۆکەخانەکانە، ئەمەش بووەتە هۆی دروستبوونی سەختی لە گواستنەوەی دۆلاری نەختینە لە ڕێگەی گواستنەوەی ئاسمانییەوە، بەتایبەت لەگەڵ پەککەوتن یان کەمکردنەوەی گەشتەکان لە ناوچەکەدا"، ئاماژەی بەوەشکرد: "ئەم وەستانە بە کاتی و کورتخایەن دادەنرێت و پەیوەستە بە بارودۆخی کارپێکردنەوە، نەک ڕەنگدانەوەی کێشە بێت لە سیاسەتی نەختینەیی یان نەبوونی دراوی بیانی بە گشتی".
وتیشی: "بەشە هەرە گەورەکەی داواکاری لەسەر دۆلار کە بە نزیکەی ٩٥٪ دەخەمڵێندرێت و تایبەت کراوە بۆ دابینکردنی دارایی بازرگانی دەرەکی (هاوردەکردنی کاڵا و خزمەتگوزاری و سوودە جیاوازەکان)، تائێستاش بە شێوەیەکی ئاسایی لە ڕێگەی کەناڵە بانکییە فەرمییەکانەوە و بەبێ پچڕانێکی ئەوتۆ بەڕێوەدەچێت"، ئاماژەی بەوەشدا: "پێویستی گەشتیاران بۆ دراوی بیانی دەکرێت لە ڕێگەی جێگرەوە نوێیەکانەوە دابین بکرێت، وەک کارتەکانی پارەدانی ئەلیکترۆنی بە دراوی بیانی، کە ڕێگە بە خاوەنەکانیان دەدات پارەدان و ڕاکێشانی پارە لە دەرەوەی وڵات بە ئاسانی ئەنجام بدەن، ئەمەش پشتبەستن بە دۆلاری نەختینەی ڕاستەوخۆ کەم دەکاتەوە".