زیقار – INA – زەهرا سەباح
دەستەی گشتی شوێنەوار و کەلەپوور، ئەمڕۆ چوارشەممە، دەستپێکردنی کارەکانی چاکسازی و نۆژەنکردنەوەی "زەقورەی ئۆر"ی شوێنەواری لە پارێزگای زیقار ڕاگەیاند.
کازم حەسوون، ئەندامی پشکێنەری شوێنەوار و کەلەپووری زیقار، بە ئاژانسی هەواڵی عێراقی ڕاگەیاند: "دەستەی گشتی شوێنەوار و کەلەپوور، بە سەرپەرشتی فەرمانگەی چاکسازی گشتی و بە هەماهەنگی لەگەڵ پشکێنەری شوێنەواری پارێزگاکە و لەژێر چاودێری ڕاستەوخۆی ڕێکخراوی یونسکۆ، دەستی کردووە بە کارەکانی نۆژەنکردنەوەی زەقورەی ئۆری مێژوویی."
ئاماژەی بەوەشکرد: "پلانی نۆژەنکردنەوەکە بەسەر سێ خاڵی سەرەکیدا دابەش بووە کە بریتین لە: ڕوکاری سەرەکی، پلیکانەکان، و چینی دووەم." وتیشی: "کارەکان دووبارە دیزاینکردنەوەی چینی سێیەمیش دەگرێتەوە کە بەپێی زانیارییە مێژووییەکان تەنها نزیکەی ٢٧ سم لێ ماوەتەوە."
حەسوون جەختیکردەوە: "ئەم هەڵمەتە حەوتەمین هەڵمەتە لە مێژووی زەقورەکەدا لەو کاتەوەی لە سەردەمی بنەماڵەی سێیەمی ئۆردا دامەزراوە، و چاوەڕوان دەکرێت کارەکان لە ماوەی شەش مانگدا تەواو بن." ئاماژەی بەوەشدا: ئەو کەرەستانەی لە نۆژەنکردنەوەکەدا بەکاردێن، خراونەتە ژێر تاقیکردنەوەی زانستی ورد و لەسەر ئاستی نێودەوڵەتی و ناوخۆیی پەسەندکراون.
لەلایەکی دیکەوە، عەبدوڵا نەسروڵا، پشکنەری شوێنەوار، بە ئاژانسی ڕاگەیاند: "هۆکارە سروشتییەکان و بارودۆخی بیابانی دەوروبەری زەقورەکە، بوونەتە هۆی زیانگەیاندن بە دیوارەکان بەهۆی تپۆڵە لمییەکانەوە، ئەمەش وایکردووە دەستوەردانی بەپەلە پێویست بێت."
ئەوەشی ڕوونکردەوە: "کارەکانی نۆژەنکردنەوەی ئێستا کە پەیژە ناوەندی و لایەنییەکان دەگرێتەوە، تەنها پشت بە گۆڕینی ئەو پارچە زیانلێکەوتووانە دەبەستێت کە لە تاقیگەکانی زانکۆی موستەنسریە پشکنینیان بۆ کراوە." دووپاتیشیکردەوە: "پرۆسەی نۆژەنکردنەوەکە لەلایەن کەسانی پسپۆڕ و شارەزا ئەنجام دەدرێت بۆ ئەوەی ناسنامەی شوێنەواریی بیناکە وەک خۆی بپارێزرێت و ڕێگری بکرێت لە شێواندنی سیما مێژووییەکانی."