نەینەوا – INA - محەمەد حەداد
ئەمڕۆ دووشەممە، پارێزگاری نەینەوا، عەبدولقادر دەخیل، دەروازەی ڕەبیعەی لەگەڵ سووریا کردەوە.
پەیامنێری ئاژانسی هەواڵی عێراقی (INA) ڕایگەیاند: "پارێزگاری نەینەوا، عەبدولقادر دەخیل، ئەمڕۆ بە ئامادەبوونی بەرپرسانی هەردوو دەستەی دەروازەکان و گومرگ، دەروازەی سنووریی ڕەبیعەی لەگەڵ سووریا کردەوە".
دوێنێ یەکشەممە، دەستەی گشتیی گومرگ گرنگیی ئابووری و ستراتیژیی دەروازەی سنووریی ڕەبیعەی لەگەڵ سووریا ڕوونکردەوە و ئاماژەی بەوەکرد کە کردنەوەی دەروازەکە دەبێتە هۆی زیادبوونی داهات و بوژانەوەی ئابووریی ناوچەکە، هاوکات جەختی لە ئامادەیی تیمەکانی کردەوە.
ئاماژەی بەوەشکرد کە "دەروازەکە گرنگییەکی ئابووری، سیاسی و ئەمنیی گەورەی هەیە، چونکە بۆ ئاڵوگۆڕی کاڵا و شتومەک و هەناردەکردنی نەوت بەکاردێت، جگە لەوەی دەبێتە ڕێڕەوێک بۆ کاڵا تورکییەکان لە ڕێگەی خاکەکانی سووریاوە، ئەمەش بەشدار دەبێت لە زیادکردنی سەرچاوەکانی دەوڵەت و بوژانەوەی ئابووریی ناوچەکە".