بەغدا – INA – ئەحمەد فەراجی
ئەمڕۆ دووشەممە، وەزارەتی ناوخۆ، کردنەوەی 3 خاڵی پەیوەندی نوێی لەگەڵ وڵاتانی ئەڵمانیا و ئوسترالیا و نێجیر بۆ بەرەنگاربوونەوەی ماددە هۆشبەرەکان ڕاگەیاند، هاوکات ئاماژەی بە چاکبوونەوەی تەواوەتی 6729 بەکارهێنەری ماددەی هۆشبەر کرد.
سەرۆکی فەرمانگەی پەیوەندییەکان و ڕاگەیاندن لە وەزارەت، لیوا میقداد میری، لە کۆنگرەیەکی ڕۆژنامەوانیدا کە پەیامنێری ئاژانسی هەواڵی عێراقی (INA) ئامادەی بوو، ڕایگەیاند: "لە ماوەی چارەکی یەکەمی ئەمساڵدا، 1 تەن و 307 کگم لە ماددەی هۆشبەر دەستی بەسەردا گیراوە، هەروەها سزای دادوەری بۆ 2020 حوکمدراو و تاوانبار دەرچووە، کە لە نێوانیاندا 34 تۆمەتبار سزای لەسێدارەدانیان بۆ دەرچووە و 137 کەس سزای زیندانی هەتاهەتایی و 1849 کەسیش سزای جۆراوجۆریان بەسەردا سەپێنراوە"، ڕوونیشیکردەوە کە "کۆی گشتی ئەو کەسانەی لەمساڵدا دەستگیرکراون گەیشتووەتە 4260 تۆمەتبار".
ئاماژەی بەوەشکرد: "193 تۆر لە بازرگانانی ماددەی هۆشبەرمان دەستگیرکردووە کە 35یان تۆڕی نێودەوڵەتین، هاوکات 10 ئۆپەراسیۆنی دەرەکی لە سووریا و کوەیت ئەنجامدراون. هەماهەنگیمان لەگەڵ وڵاتان هەیە بۆ سنووردارکردنی تاوانی ماددەی هۆشبەر، بە جۆرێک 3 خاڵی نوێمان لەگەڵ ئەڵمانیا و ئوسترالیا و نێجیر کردووەتەوە و ژمارەی خاڵەکانی پەیوەندی نێودەوڵەتی گەیشتە 36 خاڵ لەگەڵ 36 وڵاتدا".
ئەوەشی خستە ڕوو کە "ژمارەی ئەو دەستگیرکراوانەی لە وێستگەکاندا ماونەتەوە 1806 کەسن، بەڵام ژمارەی ئەو دەستگیرکراوانەی چوونەتە نێو سەنتەرەکانی چارەسەرکردن (نەخۆشخانەکان) گەیشتووەتە 8183 کەس، لەو ژمارەیەش 6729 تۆمەتبار بە تەواوی چاکبوونەتەوە، ئەمەش بۆ یەکەمجارە لە وەزارەتی ناوخۆدا ڕووبدات".
لای خۆیەوە، بەڕێوەبەری گشتیی کاروباری بەرەنگاربوونەوەی ماددە هۆشبەرەکان و کارتێکەرە ئەقڵییەکان، فەریق ئەحمەد زەرگانی، لە وتەیەکدا لە کاتی کۆنگرە ڕۆژنامەوانییەکەدا دووپاتی کردەوە: "عێراق پلەی یەکەمی لەسەر ئاستی وڵاتانی عەرەبی بەدەستهێناوە لە کێبڕکێی دەزگاکانی بەرەنگاربوونەوەی ماددە هۆشبەرەکان کە ساڵی ڕابردوو لە تونس بەڕێوەچوو، هەروەها پلەی یەکەمی لەسەر ئاستی نێودەوڵەتی لە لایەنی کارە هەواڵگرییەکان بەدەستهێناوە و لە دوای ئەویش دەوڵەتی ئیمارات دێت".
ئاماژەی بەوەش کرد کە "عێراق یەکێکە لەو دەوڵەتانەی لە ئەنجامدانی ئۆپەراسیۆنی دەرەکی بۆ بەرەنگاربوونەوەی ماددە هۆشبەرەکاندا جیاواز بووە و سەرکەوتنی بەدەستهێناوە".