بەدواداچوون - INA
نەبیه بەری، سەرۆکی پەرلەمانی لوبنان، ئەمڕۆ پێنجشەممە پەیامێکی ئاراستەی خەڵکی باشووری لوبنان کرد و داوای لێکردن پەلە نەکەن لە گەڕانەوە بۆ شارۆچکە و گوندەکان دوای ئاگربەست.
بەری لە ڕاگەیەندراوێکدا کە ئاژانسی هەواڵی عێراقی (INA) بەدواداچوونی بۆ کردووە ڕایگەیاند: ئەی کەسوکارە ئازیزەکانمان، ئەی ئەو کەسانەی باشوور و بیقاع و زاحیەتان لە دڵتاندا هەڵگرتبوو کاتێک خاکە پیرۆزەکەتان جێدەهێشت، ئەی ئەوانەی ڕۆڵەکانتان بە خوێن و قوربانیدان مێژووی خۆڕاگری و شکۆمەندی و پابەندبوونی نیشتمانییان نووسییەوە، ئەی ئەوانەی تینووی گەڕانەوەن بۆ شارۆچکە و گوندەکانتان، وەک هەمیشە لە کاتە سەختەکاندا، ئێمە لە ئازاری بیرکردن و تاڵیی چاوەڕوانی تێدەگەین.
وتیشی: پێتانت دەڵێین کە پاراستنی سەلامەتی و گیانی خۆتان لە لەپێشینەی ئەرکەکانە و ڕاستگۆترین وەفایە بۆ خاک، داواشی لە هەمووان کرد پەلە نەکەن لە گەڕانەوە بۆ شارۆچکە و گوندەکان تاوەکو بارودۆخ و پێشهاتەکان بەپێی ڕێککەوتنی ئاگربەست ڕوون دەبنەوە.
پێشتر لەمڕۆدا (پێنجشەممە)، دۆناڵد ترەمپ سەرۆکی ئەمریکا جەختی لە ڕێککەوتن لەسەر ئاگربەست لە لوبنان بۆ ماوەی ١٠ ڕۆژ کردەوە، کە لە نیوەشەوی ئەمڕۆ پێنجشەممە لەسەر هەینی دەستپێدەکات