بەغداد – INA
یەکێتیی گۆڕەپان و مەیدانی عێراق، ڕۆژی 18ی نیسانی ئەم مانگەی وەک رێككەوتێكی نوێ بۆ دەستپێکردنی ڕکابەرییەکانی پاڵەوانێتی یانە و دامەزراوەکانی عێراق (خولی دووەم) بۆ سەرجەم تەمەنەکان و بۆ هەردوو ڕەگەز دیاریکرد، ئەمەش دوای ئەوەی پێشتر پاڵەوانێتییەکە دواخرابوو.
لە بەیاننامەیەکی یەکێتییەکەدا کە بۆ ئاژانسی هەواڵی عێراقی نێردراوە، هاتووە: "یەکێتییەکە بڕیاریدا بە ئەنجامدانی پاڵەوانێتییەکە کە بڕیاربوو سەرەتای ئەم مانگە بەڕێوەبچێت، بەڵام بەهۆی بارودۆخی ئەمنیی ناوچەکە و هەروەها لەبەرچاوگرتنی پێشخستنی کاتی تاقیکردنەوەکانی خوێندن و فشاری بەشدارییە دەرەکییەکانی هەڵبژاردە نیشتمانییەکان، دواخرابوو."
بەیاننامەکە ئاماژەی بەوەشکردووە: "ڕکابەرییەکان ڕۆژی شەممە ڕێکەوتی 18ی نیسان بە ئەنجامدانی یارییەکانی بازدانی بەرز لە پارێزگای نەجەفی ئەشرەف بۆ هەموو تەمەنەکان دەستپێدەکات، بڕیاریشە کۆنگرەی هونەریی پاڵەوانێتییەکە لە شاری بەغداد لە ڕۆژی سێشەممە 21ی نیسان بەڕێوەبچێت."
هەروەها هاتووە: "یاریگای وەزارەتی وەرزش و لاوان (سەنتەری نیشتمانی بۆ بەهرەمەندانی وەرزشی) لە بەغداد، میوانداری چالاکییە سەرەکییەکانی پاڵەوانێتییەکە دەکات لە ماوەی نێوان 22 تا 24ی نیسان، کە پێشبڕکێکانی نیوە ماراسۆن و ڕم و چالاکییە تێکەڵاوەکان لەخۆدەگرێت، لە کاتێکدا پێشبڕکێکانی (قورسایی، دیسک، و چەکوش) لە یاریگای بەییاع بەڕێوەدەچن."
یەکێتییەکە لە بەیاننامەکەیدا تیشکی خستووەتە سەر ئەوەی کە: "ئەنجامەکانی ئەم پاڵەوانێتییە دەبنە پێوەری سەرەکی بۆ هەڵبژاردن و ناونووسکردنی یاریزانانی هەڵبژاردە نیشتمانییەکان کە بەشداری لە پاڵەوانێتییە نێودەوڵەتییەکانی داهاتوودا دەکەن"، جەختیشی کردەوە کە "هەر گۆڕانکارییەک لە ڕێکخستنی یارییەکاندا ڕووبدات، لە دوو ڕۆژی داهاتوودا ڕادەگەیەنرێت."