بەغدا – INA
ئەمڕۆ دووشەممە، دەستەی دەسپاکی، دەرچوونی فەرمانی دەستگیرکردنی بۆ سەرۆکی لیژنەی دەسپاکی لە ئەنجومەنی پارێزگای سەڵاحەدین ڕاگەیاند، لەسەر کەیسێکی پەیوەندیدار بە بەفیڕۆدانی سامانی گشتی لە یەکێک لە پڕۆژە پەروەردەییەکاندا.
دەستەکە لە ڕاگەیەندراوێکدا کە دەست ئاژانسی هەواڵی عێراقی (INA) کەوتووە، ئاماژەی بەوە کردووە: "بڕیاری دەستگیرکردنەکە بۆ سەرۆکی لیژنەی دەسپاکی لە ئەنجومەنی پارێزگای سەڵاحەدین، لەسەر پاشخانی کەیسێکی پەیوەندیدار بە بەفیڕۆدانی سامانی گشتی بووە لە یەکێک لە پڕۆژە پەروەردەییەکاندا، لەو کاتەی کە ناوبراو پۆستی بەڕێوەبەری پێشووتری پەروەردەی پارێزگاکەی هەبووە".
دەستەکە ڕوونیکردەوە: "کەیسەکە کە پێشتر لێکۆڵینەوەی تێدا کراوە و ڕەوانەی دادگا کراوە، پەیوەندی بە پڕۆژەی بەرنامەی گەڕاندنەوەی سەقامگیری و نۆژەنکردنەوەی کەرتی پەروەردە هەیە لە پارێزگا ڕزگارکراوەکان، لە چوارچێوەی بودجەی پەروەردە بۆ ساڵی 2020، ئەوەش لە کاتی وەرگرتنی پۆستی بەڕێوەبەری گشتیی پەروەردەی پارێزگاکە لەلایەن تۆمەتبارەکەوە".
هەروەها دەستەکە ئاماژەی بەوە دا کە "دادوەری دادگای لێکۆڵینەوەی سەڵاحەدین کە تایبەتە بە کەیسەکانی دەسپاکی، بڕیاری بانگهێشتکردنی تۆمەتبارەکەی داوە بەپێی حوکمەکانی ماددەی (340) لە یاسای سزادان"، تیشکیشی خستە سەر ئەوەی کە "فەرمانی بانگهێشتکردنەکە جێبەجێ کراوە و وتەکانی بە شێوەی یاسایی وەرگیراون، هاوکات دادوەری پەیوەندیدار بڕیاری دەستگیرکردنی داوە تا کاتی تەواوکردنی ڕێکارە یاساییەکان".