بەغداد – INA – محەمەد تاڵبی
وەزارەتی پیشەسازی و کانزاکان، ئەمڕۆ چوارشەممە، پلانێکی بۆ نۆژەنکردنەوە و خستنەگەڕایەوەی ئەو کارگانەی ڕاگەیاند کە وەستاون، هاوکات جەختیکردەوە: ٢٣٤ گرێبەستی شەراکەت بۆ پشتگیریکردنی کەرتی پیشەسازی لە عێراقدا هەیە.
وتەبێژی وەزارەت زوحا جبوری، بە ئاژانسی هەواڵی عێراقی ڕاگەیاند: "وەزارەت بەنیازە لە ماوەی داهاتوودا هەنگاوی بەرچاو بنێت بۆ پشتگیریکردنی پیشەسازی نیشتمانی، لەوانەش خستنەگەڕایەوەی کارگە وەستاوەکان".
جبووری ڕوونیکردەوە: کە "کۆمپانیا گشتییەکانی سەر بە وەزارەت ٣١ کۆمپانیان، کە ٢٨یان کۆمپانیای بەرهەمهێنەر و خزمەتگوزارین، جگە لە سێ دەستەی گشتی کە بریتین لە: دەستەی توێژینەوە و پەرەپێدانی پیشەسازی، دەستەی ڕووپێوی جیۆلۆجی، و دەستەی ملیۆن پیشەسازی".
لە بەردەوامی قسەکانیدا وتی: "ژمارەی کارگەکانی سەر بە وەزارەت ٣١٢ کارگەیە، کە ٢٢٥یان کاردەکەن و ٨٧ کارگەش وەستاون"، جەختیشی کردەوە کە "لە لایەن ئیدارەی کارگە وەستاوەکان و بە ڕێنمایی و بەدواداچوونی وەزیری پیشەسازی، کارکردن بۆ نۆژەنکردنەوە و خستنەگەڕایەوەیان بەردەوامە".
ئاماژەی بەوەشکرد: "ژمارەی گرێبەستەکانی شەراکەت لەگەڵ کەرتی تایبەت ١٤٤ گرێبەستە و هێشتا لە قۆناغی جێبەجێکردندان، لە کاتێکدا ٩٠ گرێبەستی نوێ لە قۆناغی هەڵسەنگاندندان، بەمەش کۆی گشتی گرێبەستەکانی شەراکەت لەگەڵ کەرتی تایبەت دەگاتە ٢٣٤ گرێبەست".
وتەبێژەکە باسی لەوەشکرد: "وەزارەت گرێبەستی شەراکەتی هەیە کە پەیوەستن بە پیشەسازییە ستراتیژییەکانی وەک کبریت و فۆسفات، کە ڕەنگە کاتیان بوێت تاوەکو تەواو دەبن"، پێشبینیشی کرد کە "هاووڵاتییان لەمساڵدا ئەنجامە ڕاستەقینەکانی هەندێک لەم پڕۆژانە ببینن".