بەغدا - INA
وەزارەتی ناوخۆ، ئەمڕۆ چوارشەممە، ڕوودانی چەند ڕووداوێکی ئەمنی لە بەغدای پایتەخت ڕاگەیاند کە بەهۆی کەوتنەخوارەوەی مووشەک و هێرشی ئاسمانی هەردوو بەری کەرخ و ڕەسافەی گرتووەتەوە، ئەمەش بووەتە هۆی برینداربوونی ئەفسەرێک بە پلەی نەقیب و چوار کارمەند و شەهیدبوونی دوو مەدەنی.
لە راگهیندراوێكی وەزارەتی ناوخۆدا کە بۆ ئاژانسی هەواڵی عێراقی (INA ) نێردراوه تێیدا هاتووە: "وەزارەتی ناوخۆ ڕایدەگەیەنێت کە لە کاتژمێر یازدەی شەوی سێشەممە، چەند ڕووداوێکی ئەمنی لە بەغدای پایتەخت ڕوویانداوە بەهۆی کەوتنەخوارەوەی مووشەک و هێرشی ئاسمانی، کە هەردوو بەری کەرخ و ڕەسافەی گرتووەتەوە."
ههروهها ئاماژهی بۆ ئهوهیش كرد كه: "ناوچهكانی کەرخ:
• تاجی / سەبع بۆر - بازگەی شێخ عامر: بازگەیەکی سەر بە فیرقەی دووەم / لیوای پێنجەم بەرکەوتووە لە کاتی بۆردومانێکی ئاسمانی بۆ سەر سەربازگەیەکی سەر بە حەشدی شەعبی، ئەمەش بووەتە هۆی برینداربوونی ئەفسەرێک بە پلەی نەقیب و چوار کارمەند کە لە نزیک سەربازگەکە بوون.
• تاجی / سەبع بۆر / نزیک حوسەینییەی ئیمام مونتەزەر: کەوتنەخوارەوەی پارچە تەقەمەنییەک کە نەتەقیوەتەوە، تیمەکانی بەرگری شارستانی و شارەزایانی بەڕێوەبەرایەتی تەقەمەنییەکان ئاراستە کراون بۆ چارەسەرکردنی.
• عامرییە / شەقامی مونەزەمە: کەوتنەخوارەوەی پارچە تەقەمەنییەک بۆ سەر خانووێک، کە بووەتە هۆی شەهیدبوونی دوو مەدەنی."
ئاماژەی بەوەش کرد: "ناوچهكانی ڕەسافە:
• جەمیلە: سووتانی ئۆتۆمبێلێکی مەدەنی.
• شەقامی فەڵەستین / یەکتربڕینی نهخله: بۆردومانی ئاسمانی بۆ سەر خانووێکی نیشتەجێبوون و سووتانی بەشێک لە سەربانی خانووەکە بەبێ ئەوەی زیانی گیانی لێبکەوێتەوە.
• شەقامی مەغریب: سووتانی ئۆتۆمبێلێکی مەدەنی.
• شەقامی فەڵەستین: کەوتنەخوارەوەی پارچە تەقەمەنییەک کە نەتەقیوەتەوە لە نزیک بەشە ناوخۆییەکان، تیمەکانی بەرگری شارستانی و شارەزایانی تەقەمەنییەکان دەستیان بە چارەسەرکردنی دۆخەکە کردووە."
وەزارەتی ناوخۆ بەپێی راگهیندراوهكه جەختی کردەوە کە "تیمەکانی بەرگری شارستانی و دەزگا ئەمنییە تایبەتمەندەکان دەستبەجێ وەڵامی هەموو ڕووداوەکانیان داوەتەوە، و دەست کراوە بە کوژاندنەوەی ئاگرەکان و چارەسەرکردنی ئەو تەنانەی نەتەقیونەتەوە و ناوچەکان پارێزراون،" ئاماژەی بەوەش کرد کە "لایەنە پەیوەندیدارەکان دەستیان بە لێکۆڵینەوەیەکی بەپەلە کردووە بۆ ئاشکراکردنی وردەکاریی ئەم دەستدرێژییانە و گرتنەبەری ڕێکاری پێویست."
وەزارەتی ناوخۆ داوای لە هاوڵاتییان کرد وریای خۆیان بن و نزیکی شوێنی ڕووداوەکان یان تەنە نامۆکان نەبن، و لە ڕێگەی ژمارەی فریاکەوتنی (911)ەوە هەر حاڵەتێکی گوماناوی ڕابگەیەنن، جەختیشی کردەوە کە "هێزە ئەمنییەکان لەوپەڕی ئامادەباشیدان و ڕێگە بە هیچ هەوڵێک نادەن بۆ تێکدانی ئاسایش و سەقامگیری، و بەردەوام دەبن لە چەسپاندنی یاسا و پاراستنی هاوڵاتییان."